Patagonian Expedition Race-aren zortzigarren ekitaldia izan da aurtengoa. Txilekoa, munduko zeharkaldirik garrantzitsuenetakoa bilakatu da fisikoki oso zaila delako. Nazioarteko prentsak “azken lasterketa basatia” deitzen dio. Hegoaldeagoan ez dago horrelako beste probarik. Kirolariek erabili behar izaten dituzten oinarrizko garraiobide eta teknikak hauexek dira: mendiko bizikleta, trekking, itsasoko kayak, sokekin lan teknikak eta iparrorratza eta mapa baliatuz orientazioa. Air Europa Bimont laukotearekin batera, Estatu Batuak, Ingalaterra, Kanada, Suitza, Japon, Alemania, Errusia, Finlandia, Brasil, Argentina eta Txileko taldeek ere parte hartu dute. Denera, 14 talde eta 56 kirolari ibili dira, ohi den bezala oso eguraldi eta baldintza gogorretan. Hain gogora izanik, partaideen erdiak baino ez du lasterketa osoa burutu, batzuek nekeak eraginda utzi behar izan dutelako eta beste batzuek bidean galdu direlako. Bigarren urtez jarraian, Ingalaterrako Helly Hansen-Prunesco taldekoek lortu dute garaipena.
Azken sailkapena ondokoa izan zen:
1. Helly Hansen-Prunesco (Erresuma Batua): 126 ordu eta 8 minutu.
2. Air Europa Bimont (Euskal Herria / Katalunia): 142 ordu eta 46 minutu.
3. Suiza (Suitza): 145 ordu eta 6 minutu.
4. Herbertz (Alemania): 145 ordu eta 18 minutu.
5. Gearjunkie.com (Estatu Batuak): 147 ordu eta 31 minutu.
6. Untamed New England (Kanada): 148 ordu eta 17 minutu.
Txilen jokatzen den Patagonian Expedition Race izeneko lasterketan bigarren postua eskuratu du Air Europa Bimont laukoteak, Itxartuk jakinarazi duenez. Taldea Urtzi Iglesias eta Jon Ander Aranbalza getxoztarrek, Uxue Fraile gipuzkoarrak eta Saul Abril kataluniarrak osatzen dute. Zeharkaldia Magallanes itsasartean hasi zen otsailaren 10ean. Kayak, mendiko bizikleta eta trekking eginez 600 kilometro ibili ondoren, Willimas Portuan amaitu zen proba, asteartean, Suaren Lurra, Darwin Mendilerroa eta Beagle kanala zeharkatu ondoren. Emaitzarekin pozez beteta, Iglesiasek hauxe adierazi du: “Williams Portuan lasterketa amaitu ondoren, itsasontzi militar batean 32 ordutako kruzeroa egingo dugu munduko hegoaldeko kanal eta itsaso zoragarrienetatik, Punta Arenas-era joateko. Hemen ostiralean sari banaketa eta bukaerako ekitaldia egingo da”. Kirolari getxoztarrak igande honetan, otsailak 21, helduko dira etxera. Argazkian, Urtzi Iglesias (ezkerretik lehenengoa) eta Jon Ander Aranbalza (eskuinetik lehenengoa), taldekideekin, lasterketara abiatu baino lehen / © Air Europa Bimont.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun