Bihar izango dira zazpi urte Guardia Zibilak "Euskaldunon Egunkaria" itxi zuenetik
Larunbat honetan, otsailak 20, beteko dira zazpi urte, Espainiako Auzitegi Nazionalaren aginduz, Guardia Zibilak "Euskaldunon Egunkaria" itxi zuenetik. Hori gogoratzeko, ekitaldia egin dute gaur Andoainen (Gipuzkoa), hain zuzen ere, kazeta euskalduna egiten zen Martin Ugalde Kultur parkean. Itxiera, atxiloketa eta tratu txarretatik zazpi urte igaro dira, baina ekitaldira bildutakoek gogoan izan dutenez, auzia ez da amaitu, Berria.info agerkari digitalak zabaldu duenez. Epaiketa egin berri da eta epaiaren zain dira bost auzipetuak, Xabier Oleaga erandioztarra tartean. Hain zuzen ere, epai onargarri bakarra absoluzioa dela nabarmendu dute ekitaldian zehar hitza hartu duten hainbat lagunek, eta hori ere ez dela aski; Pedro Miguel Etxenike zientzialari entzutetsuak adierazi duenez, ez dela nahikoa "egindako min ikaragarria" ordaintzeko. Argazkian, Xabier Oleaga erandioztarra abenduaren 19ko nazio manifestazioan.
Xabier Oleaga Erandioko semea, Martxelo Otamendi, Iñaki Uria, Txema Auzmendi eta Joan Mari Torrealdai epaitu dituzte auzi horren barruan, "ETAko kide izatea egotzita". AVTk 14na urteko zigorra eskatzen du bost akusatuentzat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun