Isabel Velez, 48 urteko emakumea, hilik atzeman zuten atzo, Lasarte-Orian. Ustez, 23 urteko semeak hil du, labanaz, eta Ertzaintzak atxilo hartu du. Atzo hil zuten Velez, eguerdiko ordu biak aldera. Lasarte-Oriako Zelaialde kaleko bigarren atarian bizi zen, eta han ondoan agertu da hilik. Ertzaintzak bizilagun baten deiagatik jakin zuen gertatuaren berri. Deiaren arabera, emakume bat jotzen ari zen mutil bat kalean. Haraino joan ziren ertzainak, eta larri zauritua aurkitu zuten Velez, etxe ondotik errepidera jaisteko eskaileretan. Anbulantziak eskatu zituzten ertzainek, baina larrialdi zerbitzuak bertaratu zirenerako, emakumea hilik zegoen. Velezen semea lekuan bertan atzeman zuten. Lasarte-Oriako alkate Ana Urtxuegiak zehaztu du Velezek arazoak izan zituela 23 urteko semearekin, Berria.info agerkariak zabaldu duenez. Beste seme bat du Velezek, 13 urtekoa; hura ere ez zen amarekin bizi. Amak ez zuela inoiz salaketarik jarri, baina udaltzainak haien etxera zenbait alditan joan zirela jakinarazi du alkateak, istiluak izan zituztelako. Bestalde, semeak amarengandik urruntzeko agindua eduki duela azaldu dute zenbait auzok.
Emakumeen Mundu Martxako Plataformaren adierazpena:
Beste emakume bat eraila Euskal Herrian, hirugarrena
Emakumeon aurkako indarkeria gure gizartean gertatzen den giza eskubideen urraketa larrienetakoa eta hedatuenetakoa da. Emakume izateagatik jasaten dugun biolentzia oroz ari gara: sexu erasoak, prostituzio behartua, lantokietako sexu-jazarpena, jipoiak eta emakumeon erailketak... Emakumeon aurkako indarkeria patriarkatuaren oinarrian dago, eta honek, gizartean emakumeok jasaten dugun mendekotasuna betikotzeko kontrol mekanismo gisa erabiltzen du biolentzia.
Elkarretaratzea egin dute eguerdian Lasarte-Orian, Isabel Velez emakumearen hilketa gaitzesteko. Ustez semeak hil zuen atzo, ostirala, 48 urteko andrea. Ustezko hiltzaileak arazo psikiatrikoak zituela zabaldu du Eusko Jaurlaritzako Herrizaingo Sailak. Velez da emakumeen aurkako indarkeriagatik aurten hildako hirugarren emakumea. Hamabi egun eskas dira Barakaldon beste gizon batek ustez ama, Amelia Sanchez, 65 urtekoa, hil zuenetik. Lasarte-Oriako hilketak harena ekarri du gogora. Urtarrilaren 17an, berriz, Elena Cal hil zuen ustez haren bikotekide ohiak Tolosan. Gauzak horrela, gaurkoa ez da izango Velezen hilketa salatzeko protesta bakarra. Emakumeen Mundu Martxako Plataformak ere mobilizazioak antolatu ditu, hilketa salatzeko. Astelehen iluntzean egingo dituzte elkarretaratzeak, ohiko protokoloari jarraituz, Hego Euskal Herriko lau hiriburuetan, eta beste dozena bat herritan. Tartean, Algortan, 19:30etan jarri dute hitzordua, Telletxe plazan. Emakumeen aurkako indarkeria patriarkatuan oinarritzen dela nabarmendu du plataformak. Argazkian, Amelia Sanchez barakaldarraren erailketa salatzeko elkarretaratzea Algortan, orain hamar egun.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun