Getxoko trenbide-pasaguneko lanekin jarraitzeko diru gehiago jarriko du Aldundiak
Imanol Landa Getxoko alkateak oso positibotzat jo zuen herenegun, Jose Luis Bilbao ahaldun nagusiak emandako urratsa (espainolez); hau da, Bizkaiko Garraio Partzuergoaren (BGP) aurrekontuaren onarpena posible egiteko, Getxon eta beste udalerri bizkaitar batzuetan metroaren lanen jarraipena bermatuko dituzten diru-ekarpenak onartzea. “Azkenean ahaldun nagusia izan da, ez hitzekin, baizik eta konpromiso irmoekin eta, garrantzitsuena, aurrekontuarekin, lanen jarraipenerako konponbidea mahai gainean jarri duena. Era horretan, joan den asteazkenean BGPren aurrekontua onartu ez izanak eragindako zalantzak argitu ditu”, nabarmendu zuen Landak. Bilbaok aipatu urratsa eman ostean, ostiralean bertan, "Bizkaiko Garraio Partzuergorako legezko aurrekontu bat onartzeko akordioa" proposatu zion Jaurlaritzak Aldundiari. Ostegunean, 2010erako aurrekontuak atzera bota zituzten PSE-EEko ordezkariek, BGPren Kontseilu Nagusiak goizean egindako bilkuran; eta horrek Basauri, Getxo eta Santurtzin martxan dauden metroaren lanak "bertan behera gelditzea" ekarriko zuela adierazi zuen Bilbaok. Argazkian, trenbide-pasagunea Maidaganen.
Getxoko alkateak esan zuenez, “erabaki horrek lasaitu egiten gaitu, lanen jarraipena zalantzan jarri izanak getxoztarrok urduri jarri gintuelako eta, beraz, egoera honi buruzko zalantzak argitzen dituen erabaki arina beharrezkoa zen”. “Beraz, nire poztasuna agertu nahi dut azkenean aurreko egunotan zalantzarekin bizi izan duten herritar getxoztarrei lasaitasun-mezua igor diezaiekegulako”, zehaztu zuen udal agintariak. “Getxo modernizatzeko prozesua atsedenik gabe bultzatzen segituko dugu eta metroaren lurperatzea, ezbairik gabe, Getxo-Andra Mari auzoaren hobekuntza urbanistikorako oinarrizko proiektua da, baita udalerriko garraio jasangarria hobetzeko ere”, amaitu zuen Landak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun