Alkate izendatzen badute Getxo Antzokiaren proiektua aldatzea agindu die auzotarrei Marisa Arruek
Algortako Basagoiti Etorbidean daukan eraikina "saldu edo alokatzeko borondate osoa" du Telefonicak, Getxoko PPk esan duenez. Popularren arabera, horixe berau adierazi zien Oscar Alegria telekomunikazio enpresaren lurralde ordezkariak, ostiralean Bilbon egindako batzarrean. Aipatu bileran, Alegria, Venancio Echeverria Telefonicako komunikazio zuzendaria, Marisa Arrue eta Eduardo Andrade Getxoko PPko ordezkariak, Alternatiba eta Ezker Batua alderdiak, eta San Nikolas Antzokia auzo elkarteko hiru kide izan ziren. Hain zuzen ere, azken horiei zera agindu die Arruek: "PPk 2011ko hauteskundeak irabazi eta boterea eskuratuko balu, bere esku dagoena egingo du oraingo proiektua aldatu eta ingurunearen araberako antzoki txikiago bat egiteko". Bitartean, otsailaren 26ko udal batzarrerako mozioa aurkeztu dute popularrek, Telefonicarekin harremanetan has daitezela eskatuz; Basagoiti Etorbideko eraikina erosi edo epe luzera alokatuta, bertan Algortako Musika Eskola jarri eta Getxo Antzoki berriaren inpaktua gutxitzeko asmoz. Martxoaren 5ean, berriz, berriro daukate hitzordua telekomunikazio enpresako arduradunekin. Egun horretan, eraikinaren barrualdea erakutsiko diete horrela nahi duten alderdi politikoetako ordezkariei. Argazkian, ostiraleko batzarra Telefonicaren Bilboko egoitzan / © Getxoko PP.
Hain zuzen, eraikin barruan dagoen tresneria, ordenagailuak gehien bat, non kokatu izan zen auzotarrek agertutako zalantza nagusietako bat, Getxoko PPren arabera. "Alegriak azaldu die tresneria guztia solairu bakar batean pilatzea litzatekeela aukeretako bat. Eraikina erostekotan, Telefonicari alokatuko litzaioke gune hori", diote popularrek. "Bestalde, EAJ Telefonicarekin harremanetan jarri den baieztatu nahi izan dute auzotarrek. Enpresa handia dela, baina lurralde ordezkaria izan den 10 urte hauetan, Gobernu Taldearen izenean inork ez diola deitu erantzun die Oscar Alegriak", Marisa Arrue buru duen alderdiaren hitzetan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun