IAk zabaldutako oharra:
Gaurkoan, beste behin ere, UPVko errektoretza taldeak, Iñaki Goirizelaia buru duela, beste pausu handi bat eman du bere unibertsitate errepresibo honetan. Kamera, "segurata", identifikazio eta epaiketekin nahikoa ez eta Eusko Jaurlaritzako Barne Saileko buru den Rodolfo Aresekin egin nahi duten hitzarmen batekin datorkigu oraingoan. Segurtasunaren aitzakiapean, UPVko campusak kontrol sozialaren adibide garbienak bihurtzen ari dira. Jadanik gutxi dira grabatu gabe geratzen diren eremuak eta segurtasun indar pribatuen presentzia duten toki publikoak. Baina, hala ere, Goirizelaiari gutxi iruditu eta hitzarmen errepresiboetara jo du.
Zer bilatzen du honekin? Segurtasuna? Ongi dakigu ezetz! Aspaldidanik ezagutzen dugu UPVk eskaintzen digun segurtasuna: kolpeak, identifikazioak, epaiketak... Hau al da zuen segurtasuna? Ba ez dugu nahi horrelakorik! Ez dugu gure askatasuna UPVren segurtasunaren eskuetan utzi nahi! Ez dugu gure adierazpen askatasunaren ordainetan kolperik jaso nahi! Ez dugu kamerarik nahi! Ez dugu zuen zipaiorik nahi!
Nahikoa dela esateko garaia da! Ezin dugu onartu horrelako unibertsitate polizialik!
Aresi unibertsitatea ertzainez betetzeko baimena ematea leporatu dio EHUri IAk
Orain bi ostegun, otsailak 11, Eusko Jaurlaritzaren Herrizaingo Sailaren eta Euskal Herriko Unibertsitatearen arteko "lankidetza hitzarmena" onartu zuen EHUko Gobernu Kontseiluak. Horren arabera, EHU eta Herrizaingo Saileko bina kidek osatutako mahai bat eratuko litzateke, "zeinetan zuzendaritza Rodolfo Ares Herrizaingo sailburuak eta bere kideek izango luketen, hau da, eskumen guztia emango litzaioke Herrizaingo Saila eta txakurrei unibertsitatean nahi dutena egiteko", Ikasle Abertzaleak (IA) erakundeak salatu duenez. Dagoeneko 2009ko urriaren bukaeran Leioa eta Erandioko campusetik euskal preso politikoen argazkiak kentzeko zein "terrorismoari gorazarre egiten dion gertaeraren bat ematen denean" Ertzaintzari deitzea exijitu dio Iñaki Goirizelaia errektoreari Gorka Maneiro UPyDko legebiltzarkideak. Bestalde, orain gutxi, Iñaki Ezkerra izendatu zuten EHUko Gizarte Kontseiluaren kide, PPk eskatuta. Horrek "etakideek unibertsitateak izan ditzaketen pribilegioak biktimek merezi duten tokia izan dezatela" lan egingo zuela adierazi zuen, Minuto Digital agerkari espainiazaleak jaso bezala. Mobilizazioak ere iragarri ditu IAk. Argazkian, Ertzaintza EHUn aurreko batean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun