Espainiako Auzitegi Nazionaleko Fernando Andreu epailearen aginduz atxilotu ditu gaur goizaldean Polizia Nazionalak Urko Izagirre "Bosnio" eta Enrique Noya "Kini", aurrena Algortan eta bigarrena San Inazion (Bilbo). Hainbat hedabidek ETAk Guardia Zibilak Kalagorrin, Errioxan, duen kuartelaren aurka 2008an egindako atentatuarekin lotu nahi izan dituzte. "Baina, oraingoz, dagoen bakarra da Jon Rosales eta Adur Aristegik lan egiten zuten enpresa berean aritzen direla, hau da, txosnak muntatzeko enpresan", Uribe Kostako Amnistiaren Aldeko Mugimenduak adierazi duenez. Bestalde, horretan Jurdan Martitegi lanean aritu zela nabarmendu nahi izan du "El Correo Español" egunkariak. Gaur goizean, atxilotuen etxebizitzez gain, Abadiñon txosnak montatzeko enpresako egoitza ere arakatzen ibili da Espainiako polizia. Atxiloketak salatzeko mobilizazioa egingo da gaur arratsaldean Algortan, 20:00etan, Telletxen. Eta bi algortarrak inkomunikatuta jarraituz gero, ostiralera arte luzatuko dira. Argazkian, joan den astean izandako atxiloketak salatzeko manifestazioa Algortan.
Bitartean, atxilotuak polizien eskuetan inkomunikatuta egoteak dakarren torturatuak izateko arriskuaz ohartarazi du AAMk, Askatu.org webgunearen bitartez. "Azken asteetan atxilotu eta inkomunikatu dituzten pertsona guztiek torturak salatu dituzte, eta une honetan bi lagunak benetako tortura arriskuan daudela ohartarazi nahi dugu. Inkomunikazioak tortura ahalbideratzen du eta gogora ekarri nahi dugu pasa den astean bertan Espainiako Polizien eskutik torturak salatu dituela euskal herritar batek", salatu du errepresioaren kontrako erakundeak. Guardia Zibilak eta Espainiako Polizia Nazionalak beste sei lagunen bila dabiltzala ere zabaldu dute hainbat hedabidek, tartean Jon Rosales algortarraren neska laguna egongo litzatekeela.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun