Asteazken honetan, otsailak 24, olatuek 5 metroko altuera gaindi lezaketela ohartarazi du Eusko Jaurlaritzaren Herrizaingo Sailak. Iragarpenen arabera, olaturik handienak 16:00etatik 22:00etara helduko dira, baina 13:00etatik aurrera 3,5 metrokoak ere jasoko dira, eta gora egiten jarraituko dute; 16:00ak aldera hasiko dira 5 metro baino gehiagoko olatuak heltzen. Arriskurik handieneko orduetarako, Herrizaingo Sailak alerta laranja ezarri du; 22:00etatik aurrera, aldiz, olatuen indarra ahultzen hasiko da, eta ostegun goizalderako olaturik handienek 3,5 metroko altuera izango dute. Hortaz, Euskalmet Euskal Meteorologia Agentziaren abisua aztertuta, olatuek eragindako alertak haizeak eragindakoarekin bat egingo du bihar. Azken kasu horretan, maila horikoa izango da berriro. Izan ere, 100 kilometro ordu baino gehiagoko boladak daude iragarrita mendi inguruetarako eta kostalderako, eta 80 kilometro ordukoak gainerakoan. Argazkian, hainbat lagun itsasontzi bat lotzen aurreko batean.
Asteazkenean, 13:00etatik 16:00etara arte, eta 22:00etatik eguerdia igaro arte, olatuek eragindako alerta maila horikoa izango da, haizearengatik ezarritakoa bezalakoa. Herrizaingo Sailak gomendio batzuk luzatu dizkie herritarrei: besteak beste, urruneko hondartzak, edo ezagutzen ez ditugunak, saihestea; olatu handietako guneetatik eta olatuak lehertzen direneko lekuetatik urruntzea; eta ibilgailurik ez erabiltzea kostaldeko errepideetan; uretako kirolik ez egiteaz gain.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun