Enrique Noya Santos "Kini" eta Urko Izagirre Uriarte goizaldean atxilotutako algortarrak Madrilerako bidean eraman dituela iragarri du Espainiako Barne MInisterioak. Espainiako Polizia Nazionalak dagoeneko lau miaketa egin ditu, "ETA laguntzeko sare" baten aurka jarduten duela argudiatuta. Fernando Andreu Auzitegi Nazionaleko epaileak agindutako operazio hori zabalik dagoela ziurtatu du Ministerioak. Besteak beste, Noya eta Izagirreren etxeak San Inazion eta Algortan eta biek lan egiten duten Abadiñoko txosnen enpresa arakatu dituzte. Ministerioak prentsari ohar batean nabarmendu nahi izan dionez, atzemandako gauzen artean "kanpin-gas botila bat; 'Kloratita' izeneko liburu bat; material informatiko asko; eta, ETA banda terroristarekin loturiko dokumentazioa" leudeke. Informazio horrekin Europapress albiste agentziak atxilotuei "lehergailuei buruzko liburu bat" atzeman dietela esan du. Efe-ren arabera, Noyak eta Izagirrek "lehergailuak ekoizteko esku-liburuak" zituzten. Bitartean, AAMk mobilizazioa egingo du Algortan 20:00etan. Argazkian, Kloratita musika taldeko kideak "Kloratita. Etikaz mintza gaitezen..." liburua, CDa eta DVDa aurkezten 2006an / copyleft Indymedia Euskalherria.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun