Gaur iluntzean 275 lagun inguruk egin dute manifestazioa Algortako kaleetan zehar, Enrique Noya "Kini" eta Urko Izagirre "Bosnio" herrikideen atxiloketak salatzeko. Uribe Kostako Amnistiaren Aldeko Mugimenduak azaldu duenez (mp3), familiarrek torturaren aurkako protokoloa aplikatzea eskatu dute eta horrela egingo dutelakoan daude. Izan ere, Espainiako Polizia Nazionalak 18:00etan deitu du Izagirreren gurasoen etxera, Madrilen daukatela esanez. Noya ere bertara eraman dutela adierazi du Barne Ministerioak. "Hain zuzen ere, senideei deitzea da protokoloan jasotzen den neurrietako bat eta horrela egin dute. Konfiantzazko mediku baten arreta jaso beharko lukete orain eta egiten dizkieten galdeketak grabatzeko", azaldu errepresioaren kontrako erakundeak. Halere, ostiralera bitartean, egunero izango dira mobilizazioak Algortan, 20:00etan, Telletxen, "inkomunikazioak tortura bermatzen duelako". Etzidamurako bi algortarrak Fernando Andreu Auzitegi Nazionaleko epailearen aurretik igarotzea espero dute. Argazkian, Ertzaintzak arratsaldean pankartak eroan eta zahar bat erabili behar izan dute gaurko manifestaziorako.
Uribe Kostako AAMk jakinarazi duenez, bart gauerdiko 12etan heldu dira Izagirreren gurasoen etxera, Algortara, Espainiako polizia nazionalek. Bertan ez denez egon, agenteetako batzuk tokian geratu eta beste batzuk bizi den etxera joan dira bila. "Etxeko atea bota, bilurrak jarri eta lurrera bota dituzte barruan egon diren hiru lagunak (Izagirre barne). Lau orduko miaketaren ostean, hankaz gora utzi dute etxea", salatu du errepresioaren kontrako erakundeak. Handik, goizeko 4ak aldera, gurasoen etxera joan dira bueltan, ordu betez arakatzeko. "Kiniren atxiloketa antzekoa izan dela uste dugu", gaineratu dutenez. Bestalde, Izagirreren etxean aurkitutako Kloratita musika taldearen disko-liburua hedabideek "lehergailuei buruzko eskuliburutzat" hartu dutela salatu dute. Horretaz gain, telebista kamerak ere bertan zirela kritikatu dute. Hedabideen jokabideari dagokionez ondokoa adierazi du AAMk: "poliziak gidoia idatzi du, atxilotuak inkomunikatu eta torturatu egingo ditu gidoia deklarazioetan behar bezala ager dadin. Aipatutako komunikabideek ez dute bakarrik poliziak esaten duena zabaltzen. Ez da nahikoa haiek esandakoa errepikatu eta gidoiari sinesgarritasuna ematea. Ez, ez da nahikoa, poliziak esaten dituena garatu egiten dute, euren gogoetara, zer gogo duten argi erakutsiz bestalde". Bitartean, arratsaldean, atxiloketak salatzeko pankartak eraman ditu Telletxetik Ertzaintzak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun