Noya eta Izagirreri protokoloa aplikatzea "tortura saihesteko nahikoa ez" dela dio AAMk
Espainiako Polizia Nazionalak atzo atxilotutako Enrique Noya "Kini" eta Urko Izagirre "Bosnio" algortarrek inkomunikatuta jarraitzen dute. Abokatuak tortura ekiditeko hainbat neurri hartzeko eskatu zion Fernando Andreu Auzitegi Nazionaleko epaileari eta horrek protokoloa deritzona onartu du. Beraz, teorian, atxilotuek konfiantzako medikuarekin egoteko aukera izango dute, atxiloketa aldia kameraz grabatua izango da eta senideei atxilotuen egoeraren berri emango zaie. Hala ere, Amnistiaren Aldeko Mugimenduak gogora ekarri duenez, "aurrez ere protokolo hau aplikatu izan zaie zenbait atxiloturi eta, hala ere, torturak salatu izan dituzte". Bestalde, "oraindik ez da frogatu atxiloketa aldia kameraz grabatua izan denik, defentsako abokatuak ez baitu aukerarik izan bideo hauek ikusteko", gaineratu du errepresioaren kontrako erakundeak. Zentzu horretan, tortura ekiditeko neurri eraginkor bakarra "inkomunikazio amaitu eta atxilotua zuzenean epailearen aurrera eramatea" dela uste du AAMk, "inkomunikazio egoerak tortura egon dadin ahalbideratzen duelako". Haizea Ziluaga abokatuak azken atxilotuek, Jon Rosales algortarra tartean, jasandako torturei buruz aritu da Info7 irratian (mp3). Argazkian, atzo bezala, gaur ere manifestazioa egingo dute Algortan, 20:00etan, Telletxetik abiatuta.
Horretaz gain, hedabideen "manipulazioa" salatu du Amnistiaren Aldeko Mugimenduak. "Izagirreren etxetik Kloratita musika taldearen CD-a eta liburuxka eraman zituzten, eta komunikabideentzat hau nahikoa izan da atxilotuek lehergailuak egiteko eskuliburua zutela baieztatzeko", aipatu dutenez. "Beste behin hainbat komunikabideren manipulazioa eta informatzeko modu okerrak mahai gainean gelditu dira. Inolako kontrasterik gabe poliziaren informazioari sinesgarritasun osoa emateko joera dago, baina honelako hanka sartzeen ondoren inoiz gutxitan ikusi izan ditugu akatsak zuzentzen. Estatuaren errepresio estrategia itsuan hainbat hedabidek jokatzen duten papera mahai gainean gelditu da beste behin ere", salatu du AAMk.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun