Eusko Jaurlaritzako Herrizaingo Sailak alerta laranja ezarri du ostegun honetarako, haizea dela eta. Izan ere, haize boladek 120 kilometro orduko abiadura har lezakete bihar hainbat tokitan. Gainera, itsasaldeko arriskua dela-eta gaur arratsalderako abiatutako alerta laranjari eutsi diote, bost metrotik gorako olatuak egon baitaitezke. Udalek, larrialdi zerbitzuek eta zerbitzu publikoek alerta egoeran jarraitzen dute eta abisuak jasotzen ari dira SOS Deiak-en bidez. Bitartean, Herrizaingo Sailak gomendio batzuk luzatu dizkie herritarrei. Besteak beste, ondorengo aholku hauek eman ditu: leihoak, ateak eta toldoak ondo finkatzea; erlaitzetatik, hesietatik, zuhaitzetatik edo publizitate-hesietatik urruntzea; kontu handiz jokatzea errepidean; hondartzak saihestea; eta uretako kirolik ez egitea. Argazkian, SOS Deiak 112 zerbitzura deitzea gomendatu dute edozein larrialdi egotekotan.
Euskalmet Meteorologiaren Euskal Agentziak egindako iragarpenaren arabera, biharko, 3:00etatik 15:00etara deitu dute alerta laranja, ordu tarte horretan hego-mendebaldeko haize ufadek 120 kilometro orduko abiadura hartuko baitute haizegunetan eta 100 kilometro ordukoa haizeguneak ez diren tokietan. Gainerako orduetarako alerta horia ezarri dute, 80-100 kilometro ordu inguruko haize boladak espero baitira, zonalde bakoitzaren arabera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun