Langabezia eta pentsioen murrizketaren kontrako plataformaren oharra:
Orain arte Gobernuari presioa egin dion bakarra patronala izan da. Presioa herriak egiteko garaia da!
Jasaten ari garen krisi ekonomikoaren aurrean PSOEk zuzentzen duen Estatuko Gobernuak Murrizketa Plana onartu du, langileen interesen eta eskubideen kontrako eraso nabarmena dena:
- Jubilazioa 67 urtera arte luzatu nahi dute.
- Pentsioak murriztu nahi dituzte.
- Enplegua sortzeko beharrezkoak diren inbertsioak murriztu nahi dituzte.
Neurri horiek guztiak onuragarriak dira patronalarentzat, bankuentzat, multinazionalentzat eta beraien nazioarteko erakundeentzat, horiek direlako orain arte Gobernuari presioa egin diotenak.
Bultzada horri aurre egiteko, hiritarrok eta langileok gure pasibotasunarekin apurtu behar dugu, gure eskubideak defendatzeko, gure burua antolatzeko eta mobilizazioari ekiteko, harik eta Gobernua neurri horiek guztiak bertan behera utzi arte.
Etor zaitez martxoaren 4ean, osteguna, arratsaldeko 7:30ean egingo dugun bilerara non egin ditzakegun informazio eta mobilizazio ekintzak aztertuko ditugun. Bilera Leioako Langabetuen Asanbladaren lokalean egingo da (Donibane Auzoa 1, behea).
Langabezia eta pentsioen murrizketaren kontrako plataforma
Espainiako Gobernuaren murrizketen aurrean mobilizatzera deitu dituzte herritar eta langileak Leioan
Leioan sortu berri den Langabezia eta pentsioen murrizketaren kontrako plataformak deituta, hamarnaka lagunek egin zuten elkarretaratzea, atzo iluntzean, Bulebarrean, "herritar eta langileoi mobilizatzeko garaia heldu zaigula" aldarrikatzeko. Krisi ekonomikoaren aurrean, PSOEren Estatu Gobernuak onartutako Murrizketa Plana "langileen interesen eta eskubideen kontrako erasotzat" jo zuten atzoko protestan. Besteak beste, "erretiroa hartzeko adina 67 urtera arte luzatu nahi dute, pentsioak murriztu nahi dituzte eta enplegua sortzeko beharrezkoak diren inbertsioak txikiagotu nahi dituzte", salatu zutenez. Langabezia eta pentsioen murrizketaren kontrakoek diotenez, neurri horiek guztiak "onuragarriak dira patronalarentzat", euren hitzetan, "horiek direlako orain arte Gobernuari presioa egin diotenak". Hori dela eta, "hiritarrok eta langileok gure pasibotasunarekin apurtu" eta "gure eskubideak defendatzeko, gure burua antolatzeko eta mobilizazioari ekiteko" ordua dela aldarrikatu zuten, "harik eta Gobernuak neurri horiek guztiak bertan behera utzi arte". Hurrengo ostegunerako, martxoak 4, batzar irekia deitu dute, 19:30ean, Leioako Langabetuen Asanbladaren lokalean (Donibane Auzoa 1, behea). Argazkian, atzoko elkarretaratzea Leioan / © Langabezia eta pentsioen murrizketaren kontrako plataforma.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun