Irakasleen Unibertsitate Eskola berriaren "lehen harria" jarri dute Leioako campusean
Egun Bilboko Arangoiti auzoan dagoen Irakasleen Unibertsitate Eskola hartuko duen egoitza berriaren "lehen harria" jarri dute gaur Leioa eta Erandioko campusean. Halere, hasi dira jada lur azpiko aparkalekua egiteko zuloa egiten eta bi eraikinen zimenduak jartzen. Iñaki Goirizelaia EHUko errektorea, Carmelo Garitaonandia Bizkaiko campuseko errektoreordea eta Jesus Bilbao Leioako alkateordeaz gain, Jose Luis Bilbao Bizkaiko ahaldun nagusiak eta Isabek Celaa Eusko Jaurlaritzaren Hezkuntza, Unibertsitate eta Ikerketa sailburuak ere parte hartu dute goizeko ekitaldian. Izan ere, irakasleen eskola berria altxatzeko gastatuko dituzten 24 milioi euroak EHUk eta Aldundiak jarriko dituzte, bi erakundeen arteko hitzarmenari esker. Horren bitartez, Leioako campuseko Irakasleen Unibertsitate Eskolan zein, San Mamesen, Industria Ingeniaritza Teknikoko Unibertsitate Eskola eta Meatzeen eta Herri Lanen Ingeniaritza Teknikoko Unibertsitate Eskola egiteko, 65 milioi eurotatik 47 jarriko ditu foru erakundeak. Bitartean, Jaurlaritzak ordainduko ditu 363 ibilgailurentzako lur-azpiko aparkalekua egiteko 3,6 milioi euroak. Obrak 2011ko ekainerako amaitzea espero dute, eskola 2011-2012 ikasturterako funtzionatzen egon ahal izateko. Irudian, argazkirako zutitu egin den arren, denbora batez gurpildun aulkian ibili beharko du Celaak, pelbiseko ebakuntza baten ondorioz.
Arte Ederren Fakultatearen aurrean dagoen partzelan estetika modernoko bloke bi altxatuko dituzte, elkarren artean banatuak, 2.300 ikasle hartzeko asmoz. Landutako diseinuan, naturak ematen dituen baliabide energetikoak (euri-ura, eguzkiaren beroa...) ahalik eta gehien aprobetxatzeari eman dio garrantzia Cesar Azkarate arkitektoak. Zentro berriak 43 ikasgela, 16 mintegi gela, ikasteko sei gela, 160 bulego (150 irakasle eta administrazio eta zerbitzu 20 langileentzat), 28 laborategi eta zuzendaritza, administrazio eta zerbitzuetarako hainbat gune (gelak, batzar-aretoa, gradu-aretoa, ikasle elkarteentzako lokalak...) izango ditu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun