Zikloiaren sakontasunean eta ibilbidean eman daitezkeen aldaketa arinek iragarpenak eta fenomenoaren eragina asko aldatu ditzakete; hortaz, gomendagarria da egoeraren berri izatea, Euskalmetek datozen egunotan igorriko dituen iragarpenen bidez. Herrizaingo Saila larrialdi zerbitzuak koordinatzeko eta indartzeko lehen neurriak hartu ditu dagoeneko. Datozen orduotan, Euskadiko Babes Zibilaren Plana abiatuko du, egoerari dauden baliabide guztiekin aurre egiteko. Gaur, ostirala, Krisi Mahaia bildu da. Bertan, Eusko Jaurlaritza, Foru Aldundiak, Udal batzuk eta Espainiako Gobernuak Araba, Bizkaia eta Gipuzkoan duen Ordezkaritza egongo dira ordezkatuta. Gainera, koordinazio organo hori gainerako udalekin eta oinarrizko zerbitzu publikoko enpresekin harremanetan egongo da. Atzo, SOS-Deiak Larrialdiak Koordinatzeko Zentroaren bidez, Herrizaingo Sailak beharrezko abisu guztiak helarazi zizkien erkidegoan babes zibileko edo zerbitzu publikoko funtzioak dituzten instituzio edo enpresei, beharrezko prebentzio neurriak har ditzaten.
Eusko Jaurlaritzako Larrialdiei Aurregiteko eta Babes Zibileko Zuzendaritzak honako aholkuak helarazi nahi dizkie herritarrei, haize bolada gogorren eraginak prebenitzeko eta txikiagotzeko.
Prebentzio neurri gisa:
- Itxi eta ziurtatu ateak, leihoak eta oholak.
- Kendu loreontziak eta haizeak eraman ditzakeen bestelako objektuak.
- Egiaztatu aldamioak, garabiak eta obrako bestelako elementuak
Estalperik gabeko toki batean egonez gero:
- Aldendu erlaitzetatik, murruetatik, zuhaitzetatik edota publizitate-hesietatik, eta arretaz ibili obratan edo egoera txarrean dauden eraikinen aurretik pasatzerakoan.
Bidaiatuz gero:
- Saihestu errepide bidezko joan-etorriak eta, nolanahi ere, arreta handiz jokatu.
- Informatu jomugan eta igarobideetan dagoen eguraldiaren egoerari buruz.
Itsasaldean egonez gero:
- Urrundu hondartzatik eta baita haize gogorren ondorioz sor litezkeen mareen eta olatuen eragina jasaten duten tokietatik ere.
- Saihestu ontzien erabilera eta amarrak aztertu. Ez ur kirolik egin, inola ere ez.
Istripurik izatekotan, deitu 112ra
Eusko Jaurlaritzako Herrizaingo Sailak alerta gorria ezarriko du astebururako, haize bolada gogorrak izango direla baitiote iragarpenek. Izan ere, haizeak 150 kilometro orduko abiadura gaindi lezake hainbat tokitan. Aipaturikoa da maila handieneneko alerta meteorologikoa. Hala, alerta gorriak herritarrentzat arrisku argia dagoela eta kalte materialak handiak izan litezkeela erakusten du. Euskalmeten arabera, larunbatean (otsailak 27) hel liteke, "ziklogenesi lehergarria" deritzon prozesu baten ondorioz. "Bere eboluzioa eta eragina azkarrak dira. Iragarpenen arabera, Iberiar Penintsulako hego-mendebaldetik Frantziako ipar-mendebaldera igaroko da; Galizian 970 milibareko gutxieneko presioa izatea aurreikusi dute", azaldu du Herrizaingo Sailak. Fenomeno horren eraginez, larunbat arratsaldean eta igande goizaldean hegoaldeko haize-bolada bortitzak eta, tarteka, oso bortitzak, egongo dira. Larunbateko 15:00etatik igande goizaldeko hiruetara biziko da unerik kritikoena. Mendiko eremuetan, haize ufadek 150 kilometro orduko abiadura gaindi lezakete eta, lurraldeko gainerako tokietan, bereziki Arabako lautadan eta Bizkaiko mendebaldean, 120 kilometro ordukoa. Argazkian, 2009ko urtarrilaren 24ko ziklogenesi lehergarriak Algortako Satistegi kafetegi gaineko pisuko beiratea txikitu zuen erabat. Argazki gehiago ikusteko sakatu hemen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun