Getxolan zerbitzuaren bidez, Datuak Babesteko Legeari buruzko informazio jardunaldia eta trebakuntza mintegiak eskainiko die udalerriko enpresa txiki eta ertainei Getxoko Udalak. Informazio jardunaldia datorren ostegunean, martxoak 4, egingo da, 9:30etik 11:30era, Algortako kultur etxean (Villamonte). Lehenengo trebakuntza mintegiak, berriz, martxoaren 17an eta 18an egingo dira, 9:30etik 13:30era, Villamonten ere bai. Hauen guztien osagarri gisa, indarrean dagoen araudiari egokitzeko prozesua bete gura duten Getxoko enpresek aholkularitza pertsonalizatuko zerbitzua eskatu ahal izango dute. Argazkian, Algortako San Martin kaleko 17. zenbakian, Getxolanen bulegoetan eska daiteke informazio gehiago / © Getxo.net.
Informazio jardunaldiek bi orduko iraupena izango dute. Horietan, datuak babesteko araudiak enpresarentzat dakartzan eskubideak eta betebeharrak laburrean azalduko dira. Trebakuntza mintegiak ere gai horretan sakontzeko egingo dira. Zortzi orduko iraupena izango dute eta horietan datuak babesteari buruzko araudiaren oinarrizko alderdiak azalduko dira: enpresek araudia betetzeko zer egin behar duten urratsez urrats azalduko da, eta datozen guztiei Mikrolopd tresna emango zaie. Tresna hori DVD bat da, eta enpresa txiki eta ertain batek datu pertsonalak babesteari buruzko araudia betetzeko egin behar duen prozesua sistematizatzen du.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun