Eusko Jaurlaritzaren SOS Deiak zerbitzuak larunbata eta igande honetarako eman dituen eguraldiaren aurreikuspen kaltegarriak ikusita (haize bolada bortitzak edota urakan-haizeak), toki erakundeak hurrengoa gomendatu die leioaztarrei:
- Leihoetan dauden objektuak kendu edo segurtatu (loreontziak, esekitokiak…)
- Pertsianak itxi eta jaitsi herritar bakoitzak bere etxebizitzan ezagutzen duen modu seguruenean utzita.
- Kendu balkoi eta terrazetatik haizeak mugi edo bota ditzakeen objektuak.
- Posible bada, gauez, seguruak izan daitezkeen lekuetan aparkatu autoak, jaus daitezkeen objektu edo edukiontziek kolpa ez ditzaten.
- Larunbata gauean zaborra ez jaistea gomendatzen dizuegu ere bai, zerbitzua egun batez eten egingo delako haizeak edukiontziak erraztasunez mugi ez ditzan. Edukiontziek ez dute hutsik egon behar, ezta beteegi ere.
- Azkenik, ezinbestekoa ez bada lekualdatzerik ez egitea gomendatzen dizuegu.
"Neurri hauek gehi herritarron zuhurtzia nahikoa izan daitezela espero dugu, desiragarriak ez diren gertaerak ekidin ahal izateko", aipatu dutenez.
Hurrengo egunetarako iragarritako haize-bolada gogorrak direla eta, asteburu honetan, otsailak 26, 27 eta 28, Bulebar leioaztarrak hartu behar zuen merkealdien azoka bertan behera uztea erabaki du Leioako Merkatarien Elkarteak. Hala ere, udal iturriek ez dute zehaztu beste astebururen baten egingo duten, eguraldiak uzten badu behintzat. Dena den, gaur irekita mantenduko dute Merkaleioa, ohiko ordutegian: 10:00etatik 20:00etara. Zuhaitz Eguna ere bertan behera utzi du Leioako Udalak. Argazkian, hainbat lagun iazko azokan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun