Eusko Jaurlaritzako Herrizaingo Sailak dei egin die herritarrei bihar arratsaldetik aurrera ez daitezen kalera atera, iragarpenek baitiote 150 kilometro orduko abiadura har dezakeela haizeak. Raul Fernandez Arroiabe Herrizaingo sailburuordeak jakinarazi du oraindik ez dakitela zehazki nondik sartuko den ziklogenesi lehergarria. Bihar jakingo dute zehatz, eta beharrezko abisua emango diete herritarrei. Neurriak hartzen hasi dira dagoeneko. Araban, Bizkaian eta Gipuzkoan bertan behera utzi dute kanpoan egin beharreko eskola kirola. Eta berdin egiteko aholkatu dute azokak eta gisakoak egitekotan diren lekuetarako. Jaurlaritzak iragarri du larrialdi zerbitzu guztiak daudela alertan. Unerik gogorrena larunbateko 15:00etatik igandeko 03:00etara izango da, iragarpenen arabera. Argazkian, horrelakoetan ohikoa da haizeak zuhaitzak botatzea.
Eusko Jaurlaritzak, diputazioek, zenbait udalek eta Espainiako Gobernuaren EAEko ordezkaritzak krisi mahaian bilduko dira bihar arratsaldean. Haizea dela eta, alerta gorria ezarri dute Araban, Bizkaian eta Gipuzkoan. Mendiguneetan, haize boladek gainditu egingo dute 150 kilometroko abiadura. Gainerako lekuetan litekeena da 120 kilometro orduko abiadura gainditzea, bereziki Arabako lautadan eta Bizkaiko mendebaldean. Hegotik joko du haizeak. Halakoetan ohikoak diren aholkuak eman dituzte larrialdi zerbitzuek: ateak, leihoak eta eguzki oihalak ixtea; kalera eror daitezkeen gauza guztiak kentzea; eta eraikuntzako aldamioak-eta kentzea. Haizeteak kalean harrapatuz gero, berriz, zuhaitzen eta gisakoen paretik kentzeko eskatu du Jaurlaritzak, haiek erorita ere. Errepidean ere erne ibiltzeko deia egin du Herrizaingo Sailak, eta itsasora ez irteteko eskatu du.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun