Uribe Kosta eta Erandioko gainontzeko Tokiko erakundeak bezala, hurrengo gomendioak luzatu ditu Getxoko Udalak:
- Ate-leihoak ixtea eta haizeak eroan eta istripuak eragin ditzaketen tresnak kentzea kanpoaldetik (loreontziak, arropak esekitokietatik eta abar).
- Kontu handia jartzea kalean jarritako behin-behineko aldamioen azpitik ibiltzean.
- Merkataritzako lokalek kalean ondo tinkatu barik dituzten toldoak, mahaitxoak eta antzekoak kentzea.
- Aldamio, obretako hesi eta behin-behineko instalazioen arduradunek behar diren segurtasun-neurriak hartuko dituzte instalazio horietan.
- Errepidetik autoz joatea ekiditen saiatu behar da. Autoa erabili behar izanez gero, kontu handia eduki leku zabaletatik eta zubietatik igarotzean.
- Hormatatik edo teilatuetako erlaitzetatik urrun ibiltzen saiatzea eta lanetan dauden edo egoera txarrean dauden eraikuntzetatik urrun ibiltzea.
- Era berean, ez paseatu zuhaitzen aldeetatik, bereziki Makaletako eta Zugatzarteko etorbideetatik eta Galeako pasabidetik.
Oro har, norabait joatekotan, eguraldiaren iragarpen hau aintzat hartzeko eskatzen dizuegu, haize-bolada indartsu horiek eragin dezakeen arriskutik babesteko (zuhaitzak jaustea, haizeak eroandako tresnak), eta arreta berezia jartzeko autoa hartu behar izanez gero. Larrialdiren bat izatekotan honako telefono zenbaki hauetara deitu behar da: 944 660 202 (Udaltzaingoa) eta 112 (SOS Deiak).
Getxoko Krisi Mahaia abiatu dute asteburuan helduko diren haize-bolada indartsuengatik
Astebururako aurreikusten diren haize-bolada indartsuak direla eta, Getxoko Udalak udal larrialdi plana jarri du martxan eta krisi mahaia osatu du Babesgo Zibilean eta Udaltzaingoaren egoitzan. Horren ondorioz, larunbat zein igandean, bertan behera geratuko dira Getxo Kirolak erakundearen eta ikastetxe publiko, pribatu eta kontzertatuetako kanpoko kirol jarduerak. Gainera, asteburuan zehar honako hauek ere itxita egongo dira: Algortako Fadura kiroldegi kanpoko futbol, errugbi eta hockey zelaiak; tenis (estalpekoak ere bai), padel eta atletismo pistak; belodromoa; eta 50 metroko igerilekua, azken horretan, laminaren bat erortzearen arriskuagatik. Era berean, Itzubaltzeta / Romon Gobelako kanpoko futbol, tenis eta padel pistak ere itxita egongo dira. Argazkian, Getxoko Udaltzaingoaren Koordinazio Zentroa / © Getxo.net.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun