Martxoaren 10ean, asteazkena, Emakumeon Mundu Martxari egingo diote harrera eskualdean. Bizkaiko Zubitik sartuko da Uribe Kostan, 17:00ak aldera, Ezkerraldeari lekukoa hartuta, Getxoko Bilgune Feministak zehaztu duenez. 17:15ean, auto-karabanan abiatuko dira Erandiorantza; eta ordu laurden beranduago, Altzagan, metro geltoki ondoko plazan izango da ekitaldia. Ordura arte egindako horma-irudiak erakutsi eta, Kongori elkartasuna adierazteko asmoz, eskualdean egindako testigantzaren irakurketa egingo dute bertan. Izan ere, urriaren 17an, munduko emakumeak Kongoko Sud Kivu probintziara joango dira, gatazkan bizi diren emakume guztiei elkartasuna adierazteko asmoz. Amaitzeko, aipatu asteazken horretan, 18:00etan egingo diote agurra Emakumeon Mundu Martxari. Auto-karabanak gidatuko du lekukoaren furgoneta Bilboraino.
Euskal Herria morez tindatzeko asmoz, martxoaren 8tik 13ra, Euskal Herriko hainbat txokoetatik igaroko da Emakumeon Mundu Martxaren bira, "2010 arrazoi martxan jarraitzeko!" leloa lau haizetara zabalduz. Uribe Kosta eta Erandiora martxoaren 10ean, asteazkenarekin, helduko da, Getxoko Bilgune Feministak jakinarazi duenez. Gauzak horrela, harrera antolatzen hasi dira jada eskualdeko emakumeak. Larunbat honetan, otsailak 27, irudia marraztuko dute Gorliz udalerriko horma batean, parte-hartzea zabalik dagoela. Horrenbestez, goizeko 11etan bilduko dira, Plentziako portuan. Martxoaren 8ko Emakumeen Nazioarteko Egunerako, berriz, eskualde mailako hainbat ekitaldi prestatu dituzte. Iluntzeko zortzietan manifestazioan abiatuko dira, Algortako Telletxe plazatik, ondoren Tellagorrin ekitaldia egiteko. Hori bukatuta, "hamaiketakoa (gauekoa)" izango da Aldai kulturgunean, antzinako Itxasgane etxean. Argazkian, iazko martxoaren 8an izandako eskualde manifestazioa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun