Babes Zibilaren Plana eta larrialdi zerbitzuek hartutako neurri bereziak mantendu egingo ditu Herrizaingo Sailak. Hortaz, Ertzaintzaren agente, suhiltzaile eta Osakidetzako kide kopurua areagotu egin da, baita SOS Deien eta bestelako larrialdi zerbitzuen (DYA, Gurutze Gorria eta Babes Zibileko boluntario taldeak) laguntza ere, besteak beste. Iberdrola enpresak bere aldetik, mantenu talde gehiago jarri ditu lanean argindarraren funtzionamendu egokia ziurtatzeko. Krisi Mahaiak 16:00etan hasiko du bilera eta eskualde bakoitzeko egoera hurbilagotik kontrolpean izango duen Mahai Tekniko bana ere sortuko dute.
Etxean egoteko gomendioa
Herrizaingo Sailak, norbere babeserako neurriak areagotzeko eta denboraleak irauten duen bitartean etxean edo toki itxi batean egoteko eskatzen die hiritarrei eta baita, ateak, leihoak eta oholak itxi eta ziurtatzeko; loreontziak eta haizeak eraman ditzakeen bestelako objektuak kaletik kentzeko eta azkenik, mendira, itsasora edo errepidera irteerarik ez egiteko. Horrez gain, esan behar da, arratsaldeko hiruretatik aurrera, kanpoan jokatu beharreko kirol federatuko ekitaldiak eta eskola mailako era guztietako kirol partidak 24 orduz bertan behera utziko direla eta ez direla ospatuko baita, tarte horretan egitekoak ziren azoka eta feriak. Trafiko Zuzendaritzak, 7.500 kilo baino gehiagoko BGM duten kamioiei 24 ordu horietan zehar errepideetara irtetea debekatu die.
Herri guneetan 120 kilometro ordutik gorako haize boladak izateko arriskua dago
Euskalmeten azken iragarpenaren arabera, depresioaren nukleoa, ziur aski, "ziklogenesi leherkor" bilakatuko da Araba, Bizkaia zein Gipuzkoa eta Kantauri isurialdeko beste puntu batzuetatik igarotzean, Eusko Jaurlaritzaren Herrizaingo Sailak zabaldu duenez. Galiziara joko du lehenbizi. Hartzekotan den ibilbide hau ikusita, Euskal Autonomia Erkidegoak zikloi honen eragin mailarik latzena jasango duela aurreikusten da; hiriguneetan haizeak 120 kilometro orduko abiadura gainditzea espero da eta mendi inguruetan, aldiz, 140 kilometrokoa. Haizeak eragindako alerta gorria gaur, larunbata, 15:00etan hasiko da ofizialki. Dena den, ordurik kritikoenak 18:00etatik goizaldeko 3ak artekoak izango dira. Herrizaingo Sailak, norbere babeserako neurriak areagotzeko eta denboraleak irauten duen bitartean etxean edo toki itxi batean egoteko eskatzen die herritarrei. Meteorologia alertei dagokienean, gorria da mailarik larriena suposatzen duena, herritarrek kaltetuak izateko arrisku handia dutelako eta, era berean, kalte materialak ere handiak izan litezkeelako. Argazkian, horrelakoetan ohikoa da haizeak zuhaitzak botatzea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun