Getxoko ertzain-etxeko agenteek bost gazte atxilotu zituzten atzo (ostirala) arratsaldean, bi lapurreten ustezko egileak direlakoan, Eusko Jaurlaritzaren Herrizaingo Sailak zabaldu duenez. Gorlizeko enpresa batean eta Barrikako eraikuntza batean lapurtu izana leporatzen diete. Goizaldeko ordu bi eta erdiak aldera, Gorlizeko enpresa batean egindako lapurreta baten berri izan zuen Ertzaintzak; Peugeot 106 auto batean ihes egin omen zuten lapurrek. Datu horiek kontuan hartuta hasi ziren lapurren bila, eskualde osoan zehar. Goizaldeko bostak izateko minutu eskas falta zirenean, patruila batek BI-637 errepidean (Artatzako bidegurutzean) geldiarazi zuen susmagarrien autoa. Barruan bost gazte zihoazen eta agenteek, lapurtuak izan zitezkeen sakeleko telefono bi hartu zizkieten; eta maletategian, ordenagailu eramangarri bat, erremintaz betetako hiru maleta eta argazki kamera bat antzeman zituzten, polizia iturriek diotenez. Ondorioz, bost susmagarriak atxilotu eta Getxoko komisariara eraman zituzten.
Autoan aurkitutako zenbait gauza, Barrikako eraikuntza batetik lapurtutakoak ziren, Herrizaingo Sailak dioenez. Bigarren lapurreta hori ere atzo goizaldean gertatu ei zen. Inguruetan izandako lapurretak hazi direla eta, mugape horrekiko zainketa lanak areagotu egin ditu Getxoko ertzain-etxeak azken hilabeteotan. 18 eta 25 urte bitarteko bost atxilotuek polizia aurrekariak dituzte.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun