Joan zen igandean beste planto bat egin zuen Urtzi Paul gazte algortarrak, Moron de la Fronterako Sevilla II espetxean, euskal preso politikoak dauden isolamenduko modulura eramatea exijitzeko. Baina partea sartu arren, moduluan bertan utzi zuten, Uribe Kostako Amnistiaren Aldeko Mugimenduak Etengabe bitakoraren bitartez jakinarazi duenez. "Gauzak horrela, Urtzik bere etxekoei adierazi die bakartuta jarraitzea jasanezina dela, eta jarraituko duela hortik ateratzeko hasitako dinamikan, gainerako euskal preso politikoekin batera jarri arte", gaineratu du errepresioaren kontrako erakundeak. Urtzi Paul iaz jarritako 5 urteko espetxe zigorra betearazteko atxilotu zuen Espainiako Polizia Nazionalak, abenduaren 21ean. Algortarrak eta epaitu zituzten gazte guztiek salatu zuten "torturen bidez deklarazioak sinatzera behartu" zituela Ertzaintzak. Getxotik Moron de la Fronterara 942 kilometro daude. Argazkian, Urtzi Paul atxilotu zutenean egindako manifestazioa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun