Jone Uria Albizuri gazte algortarra Bertsolari Txapelketa Nagusiko finalaurrekoetara heldu izana ez zen kasualitatea izan. Larunbatean jokatutako Abra Sariaren bederatzigarren edizioan (mp3), bere adineko hainbat bertsolarien gainetik dagoela erakutsi zuen algortarrak. Erraz gailendu zitzaien Peio Ormazabal (Arrigorriaga), Amaia Iturriotz (Urretxu), Saioa Alkaiza (Antsoain), Ekaitz Samaniego (Gasteiz) eta Ane Labakari (Lasarte). Horrela, Maddalen Arzallusek iaz jantzitako txapela etxera ekarri zuen berriro Uriak, Algortako Bertsolari Eskolak (ALBE) antolatutako sariketan. Trino Azkoitia ALBEko lehendakariak jarri zion txapela Uriari. Argazkian, Jone Uria Albizuri txapela jantzita. Argazki gehiago ikusteko sakatu hemen.
Bertso saioa hasi bezain laster jarri zituen kartak mahai gainean Jone Uria Albizurik. Buruz burukoan nork lagunduko zion jakitea zen zalantza bakarra. Orduan aurkeztu zuen bere hautagaitza Ane Labaka lasartearrak. Uriarekin batera bertso sorta ederra utzi zuen, zortziko nagusiko ariketan (mp3), biak afaltzera joanak zirela antzeztuta eta zerbitzariak kontua eramaten ez ziela. Bakarkako ariketan (mp3) ere ez zen makal ibili lasartearra eta txalo zaparrada bildu zuen, aitarik ez zuen ume baten amaren paperean jarrita. Hala ere, buruz burukora (mp3) helduta, bere nagusitasuna erakutsi zuen Uriak. Kartzelako lanean jarritako gaiari helduz, "asperraldi ederra" eragin zuen entzuleengan algortarrak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun