Imanol Landa alkateak gaurko prentsaurrekoan adierazi duenez, Urkijo kaleko lanok helburu bikoitza dute: "batetik, EHUko adituek merkataritzaren sektorea indartzeko egindako udal planaren gomendioei jarraiki, Andres Larrazabal-Paulino Mendibil-Urkijoko oinezkoentzako gunean merkataritza ibilbideak osatu nahi dira. Eta bestetik, udalerriko beste leku batzuetan egin den legez, herritarrentzat eta auzotarrentzat aisialdirako eta elkartzeko toki gehiago egokitu nahi dira “.
Lanak amaitutakoan bi gune desberdinduko dira aipatu kale tartean. Bata, Andres Larrazabal eta Iturrigorri artekoa izango da: gorri eta gris koloreko zoladura edukiko du eta bertatik bakarrik oinezkoak ibiltzeko izango da. Horregatik, aparkalekuak, espaloi estuak eta ibilgailuen bide bakarra kendu egin dira, nahiz eta garajeetako sarrera-irteerak egin ahal izango diren. Kale erdian 12 argi berri, Itzubaltzeta / Romoko Aurrezki Kutxa kalean ipini diren antzeko led argiak jarriko dituzte, baita eserlekuak ere; "guztiari abangoardiako diseinua emanez". Era berean, kale tarte horretan dauden tabernek kanpoan terrazak ipintzeko aukera izango dute. Horrela, Landaren esanetan, “Areetako erdiko merkataritza esparrua zabaldu egingo dugu, nolabait. Horretaz gain, Romon ere antzeko lanak egiten ari gara, Aurrezki Kutxa eta Gobelondo kaleak oinezkoentzat bihurtuz; baita Algortan ere, San Nikolas plazako inguruetan herri esparruak hobetuz. Eta Getxon, Malakate parkea handituz”.
Apirilaren bukaeran amaituko dituzte Areetako Urkijo kaleko lanak, Andres Larrazabal eta Club kaleen arteko zatian, oinezkoentzako bidea hobetu eta erraztu aldera, udal iturriek adierazi dutenez. Proiektuan jasotzen denez, kale osoak dituen 113 metrotatik 40 metro luzerako (213 metro koadroko azalera) tartea zaharberrituko da, oinezkoentzako bidearen baldintzak hobetzeaz gain, inguruko auzokide eta erabiltzaileen joan-etorriak ahalbidetzeko. Horretaz gain, Urkijo kaleko bigarren zati batean, Iturrigorri eta Club kaleen arteko zatian, bitariko gunea egokituko da, “plataforma bakarra” osatuz, bai oinezkoentzako, bai aparkatzeko eta zamalanak egiteko. Lan horien aurrekontua 118.000 eurokoa da eta Udalaren kontura egingo dira. Argazkian, Imanol Landa alkatea eta Joseba Arregi Hirigintza zinegotzia, gaur, Areetako Urkijo kaleko lanetan / © Getxo.net.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun