Euren kasa moldatu ezin duten 105 laguni etxez etxeko laguntza eman die Leioako Udalak
Leioako Udalaren etxez etxeko zerbitzuko langileek 32.757 lan ordu bete zituzten 2009an, eta horretaz gain aparteko 51 ordu egin zituzten (jai egunak, zubiak edota kasu berezietan), tokiko arduradunek adierazi dutenez. Zerbitzua jaso zuten 96 etxeetatik, bederatzietan zerbitzu bikoitza egin izan zen, etxeko pertsona biek behar izan zutelako arreta. Gauzak horrela, 105 dira lagundutako leioaztarrak: eskatzaileen %92, udal iturrien arabera. Etxez etxeko laguntza Gizarte Zerbitzuetatik eratorria da eta udal aurrekontuarekin bakarrik betetzen da. 2009an gorakada izan zuen horretara bideratutako diruak, 760.724 eurotara helduz. "Laguntza hau oso garrantzitsua da gure herriaren garapenerako, zuzeneko arreta eskaintzen zaielako gaixoei eta euren familiei euren etxeetan bertan. Ongizatea mantentzea da helbururik nagusiena, bai fisikoa, gizartekoa edo mentala. Horrela gaixoa bere inguruan mantentzea lortzen da, bere bizi kalitatea handituz eta hobetuz", azaldu dute Leioako Udaletik. Argazkia: © Leioa.net.
Erabiltzaileak profil konkretukoak izaten dira: autonomia pertsonalean arazoak dituzten pertsonak eta bakarrik bizi direnak; minusbaliatuak direnak eta beren autonomia pertsonalarekin arazoak dituztenak; senide bat jagoteko arazoak dituzten familiak; adingabekoen ardura hartu ezin duten familiak; eta azkenik, beren egoera pertsonalarengatik arazoak dituzten pertsonak. Etxez etxeko zerbitzuaz gain, beste batzuk ere eskaintzen ditu Leioako Udalak, esaterako: doan eskuratzen diren suteen kontrako alarmak, eta Zainduz programaren barruan kokatutako ekintza guztiak (psikoestimulazioa, psikologia, jardunaldi informatiboak...). Gainera, zerbitzua jasotako 96 etxeetatik 42k "telelaguntza" ere jasotzen dute, hots, alarmaz bitartezko zerbitzu bat larrialdi egoeretan arreta zerbitzu guztiak martxan jartzen dituena.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun