Lexuri Gallastegi berangoztarra eta Haimar Altuna ibarratarra gaur eraman ditu Frantziatik Espainiara Polizia Nazionalak. Manex Zubiaga algortarrarekin batera atxilotu zuten 2002ko maiatzean Niort-en (Frantzia) Gallastegi, ETAko kidea zelakoan. Espainiako Barne Ministerioak zabaldutako oharrean jasotzen denez, ustez, 2001eko urriaren 12an, Madrilgo Udalaren ibilgailuen gordailuan bonba autoa jartzen lagundu izana leporatzen diote egun 40 urte dituen Berangoko emakumeari. Horretaz gain, 2001eko azaroaren 6an, bonba autoa jarrita, Poliziako Unitate Zientifikoko zuzendariaren aurkako atentatuan parte hartu izana egozten diote. Terrorismo delitua, armak eta lehergailuak izatea eta erakunde terroristari laguntzea leporatzen dio Lexuri Gallastegiri Espainiako Auzitegi Nazionalak, polizia iturriek diotenez. Argazkian, Lexuri Gallastegi Espainiako Poliziak lagunduta / © Espainiako Barne Ministerioa.
Espainiako Auzitegi Nazionalak 1.481 urteko espetxe zigorra jarri zion Manex Zubiaga algortarrari eta 1.476koa Lexuri Gallastegui berangoztarrari, 2001eko azaroaren 6an Madrilgo Corazon de Maria kalean lehergailua jarri izana leporatuta. Juan Junquera Poliziako Unitate Zientifikoko idazkariaren —2008ko irailean ebazpena atera zenean, idazkariordea zela zioten albiste agentziek. 2000ko maiatzaren 26an izendatu zuten Junquera Poliziako Unitate Zientifikoko idazkari— aurka atentatua egitea omen zen ETA erakunde armatuko talde horren helburua, 35 kilo lehergaiz betetako bonba autoa eztandaraziz. 2007ko maiatzean, Pariseko 14. sekzioko epaileek 10 urteko zigorra ezarri zieten biei. Orain arte, Frantzian espetxeratuta egon da Gallastegi.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun