Goirizelaiarekin batera ondokoek hitza hartuko dute: Arturo Rodriguez Castellanos, Ekonomia eta Enpresa Zientzien Fakultateko dekanoa; Milagros Garcia Crespo, irakasle emeritua eta Politika Ekonomiaren katedraduna; Concha Cruz Iturzaeta, liburuzaina; eta Mertxe Larrañaga Sarriegi, Ekonomia Aplikatuko irakaslea eta Berdintasunerako Zuzendaritzaren lehenengo arduraduna.
Astelehen honetan, martxoan 8, Emakumeen Nazioarteko Eguna ospatuko du lehenengo aldiz Euskal Herriko Unibertsitateak (EHU). Horretarako, mahai-ingurua egingo dute, goizeko 10etatik aurrera, Sarrikoko Enpresa Zientzien Fakultatean, Berdintasun Zuzendaritzak antolatuta. Hala ere, astelehenekoa ospakizun bikoitza da EHUren arabera. Egun horretan, mende bat beteko du emakumeak Espainiako unibertsitateetan sartzea baimendu zuen errege dekretuak, 1910eko martxoaren 8koak, alegia. "Antolatutako ekitaldiarekin, gizonen eta emakumeen berdintasunaren alde unibertsitatearen baitan egiten den lana garrantzi handikoa dela erakutsi nahi du Euskal Herriko Unibertsitateak", adierazi dute EHUko iturriek. Gainera, hemendik aurrera urtero egingo dute ekitaldia, campus bakoitzean, txandaka. Argazkian, mahai-inguruan Iñaki Goirizelaia errektoreak ere parte hartuko du.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun