Martxoaren 27an abiatuko dira emakume etorkinentzako heziketa eta topaketa tailerrak Getxon
Emakume etorkinentzako (beti ere Euskal Herritik eta Espainiatik kanpoko emakumeei buruz ari dira) heziketa eta topaketa tailerretarako izena emateko epea zabalik dago. Getxoko Udalak antolatu du ekimena, bigarren urtez, Elkargune, Etorkinentzako harrera programaren barruan. Horren helburua emakumeei "bidaiari gisa izandako historiaren inguruan elkarrekin hitz egiteko eta hausnartzeko aukera eskaintzea da, pozak, tristurak eta ametsak batera komentatzeko beta izateaz gain", tokiko iturriek aipatu dutenez. Tailerrak martxoaren 27an hasiko dira eta sei larunbatetan txandakatuta izango dira, 17:00etatik 20:00etara, Gizarte Zerbitzuek Algortako Urgull kalean duten bulegoan (bigarren solairuan). Urritik abendura bitartean berriro egingo dituzte (izen ematea irailean). Pertsona interesatuek udalerriko herritarren arreta bulegoetan (Itzubaltzeta / Romo eta Algortako HABek arratsaldez ere ematen dute arreta) izena eman dezakete; baita www.getxo.net web gunearen bidez ere. Informazio gehiago 944 660 151 telefono zenbakian. Haurtzaindegi zerbitzua ere egongo da. Argazkian, emakume etorkin bat Algortako San Nikolas plazara bidean, aspaldi / © Getxo.net.
Tailerren gaiak honako hauek dira: “Emakumea naiz, nire burua maite eta baloratzen dut”, “Nire familia eta ni”, “Eskubideak ditut, onartzen ditut eta erabiltzen ditut”, “Gure sexualitateaz hitz egin dezagun emakume gisa”, “Gizonezkoen biolentziaren aurka borrokatzea” eta “Ni babesten nauten eta laguntza eskaintzen didaten baliabideak, instituzioak eta legeak”.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun