Getxoko Udalaren prentsa oharra:
Areetako moilako pasealekua, erakargarri, moderno eta atseginagoa da
Areetako moilak, bertako urbanizazio lanak amaitu eta gero, itxura erakargarri, moderno, atsegin eta ikusgarriagoa dauka bertatik ibiltzen diren guztientzat, ibiltari zein bisitarientzat. Lanak, urte erdiz egin dira, eta 2.300.000 euroko inbertsioa suposatu dute.
Jarduera hau Getxoko kultur, giza, kirol eta ekonomi ekipamenduak modernizatzeko, Imanol Landa alkatea buru duen Gobernu taldeak bultzaturiko egitasmoaren harira egin da. Prozesu honen barruan dago ere, Landak gaur nabarmendu duenez, “gure herritarrek zein bisitariek gehien estimatu eta maitatzen dituzten espazio publikoak berriztu eta beren balioa handitzea”.
Esparru horien artean dago, hain zuzen, Areetako moilako pasealekua, “Bizkaiko pasealekurik erabilienetakoa da, Getxoko pasealeku nagusiena, udalerriko irudi eta posta txartela, eta hobetu egin dute bertan argiztapen berria eta kalitate handiko hiri hornigarriak ipiniz, hesi arkitektonikoak kentzearekin batera”, nabarmendu du alkateak.
Pasealekuan zehar 99 kale-argi kokatu dituzte, berri eta modernoak, pasealeku osoan zehar, eta horri esker gauez ere gehiago eta seguruago ibili ahal izango da bertatik. Segurtasun maila ere indartu egin dute mune garaiagoa eginez “paseatzera beren neska-mutikoekin doazenen lasaitasunerako”. Hormatxoak, datorren udalditik aurrera, gainera, argi bereziak izango ditu, izan ere, munea goitik behera uraren azaleraino eta baita inguruko etxeak ere gauez argiztatzeko, ibiltokia are ikusgarriagoa eginez.
Berriztu duten pasealekuaren luzera, guztira,1.500 metrokoa da, Txurrukako monumentutik Bola hondartzarainoko tartean, eta bertan egindako lanei esker 6,5 metroko zabalera duen oinezkoen guneko zoladura zaharberritu da, baita 3m zabalerako bidegorriarena –oinezkoen gunea eta bidegorriarena maila berean utziz- eta oinezkoen atseden gunekoa ere berriztu egin da, kalitate handiko 51 banku ipiniz. Berdegune gehiago ere izango du etxe ondoetan 400 metro koadro irabazi baitira.
Azkenik, Hirigintza alorraren ardura duen zinegotziak, Joseba Arregik, bere aldetik gogoratu du, pasealeku osoan egindako lanak Areetako hondartza herrian integratuz osatu direla. “Hartara, 3 farola berezi kokatu dira hondartza argiz apaintzeko gauetan, eta errazago sartzeko pasabide berriak egokitu dira –3 arrapala daude baranda eta guztiz–, beren mugikortasun maila edozein dela ere pertsona guztiek goza dezaten, baita gauez ere”.