Areetako Zugatzarteko pasealekuan tamaina handiko 23 ezki landatzen ari dira egunotan, Getxoko Udalaren aginduz. Zuhaitzok Belgikatik datoz eta 5 eta 12 metroko garaiera dute eta batzuk, handienek, 30 urte dituzte. Tokiko erakundeak 227.360 euro gastatuko ditu, guztira, jarduera horretan. Getxo udalerrian lehenengo aldiz landatuko dituzte era horretako arbolak. Lanak datorren astera arte luzatuko dira eta Club eta Cervantes kaleen arteko tartean kokatuko dituzte aleak. Azpiegitura eta Zerbitzuetako zinegotzi Joseba Arregik, gaur aipatu duenez, “pasealeku honen paisaia berreskuratzeko lehen fasea da, azken boladan izandako eguraldi txarraren, eta batez ere, pasa den urteko ziklogenesiaren eraginez arbola asko, 17 guztira, jausi ziren eta. Horrekin batera, adinagatik eta gaixotasunagatik galdutakoek Zugatzarteko pasealekuaren nolabaiteko itxura soildua utzi dute. Horregatik, orduan galdutako zuhaitzak berriz hornitu behar ditugu pasealekuaren irudia berreskuratu aldera”. Hurrengo faseek, etorkizunean, Zugatzarte berreskuratu eta hobetzea izango dute helburu, Arregik aurreratu duenenez. Argazkian, ezki berriak landatzeko lanak / © Getxo.net.
Zugatzarteko pasealekua udalerriko ezagunenetakoa da oso zaharra delako, ehun urtetik gora ditu, eta bere luzean, 1.500 metrotan, tamaina handiko 212 ezki daudelako, horietako batzuk ehun urtetik gorakoak. Pasealekuaren albo banatara falta diren aleak ordezkatzeko tamaina handiko ezkiak landatzen ari dira, Belgikatik ekarritakoak, zinegotzi getxoztarrak azaldu duenez, “tamaina handiko arbolen tratamenduetan eta haztegietan Europan eskarmentu handiena duen herrialdea delako". "Oso esperientzia eta barietate handia dute”, gaineratu du Arregik. Zuhaitzak errepidez iristen dira Getxora, bidea egun edo egun eta erdian egiten duten trailer kamioietan, bidalketa bakoitzeko 4-5 arbola garraiatzen dituztela, beren tamainagatik. Behin gurean, trailerretik ateratzen dituzte garabi handi-handi batekin eta landatuko dituzten lekuan uzten dituzte. Zuloa eginda, alea sartzen da barrura eta lurra bota ondoren modu berezian eusten zaio arbolari. Behin kokatuta, inguruan lur asko botatzen da eta, era berean, ur asko botatzen zaio. Belgikan arbola horiek 6 edo 7 urtera tokiz aldatzen dituzte, sustraiak arbolaren oinetik hurbil egon daitezen uneoro, horri esker bizi irauteko duen ahalmena areagotu egiten baita, udal iturrien arabera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun