Bi gazte atxilotu dituzte Plentzian ibilgailu bat lapurtzen saiatu direlakoan
Ertzaintzak 14 eta 16 urteko bi adingabe atxilotu zituen bart Plentzian, ibilgailu bat lapurtzen saiatzea egotzita. Eusko Jaurlaritzaren Herrizaingo Sailak zabaldutakoaren arabera, gertakariak 23:00ak jotzeko minutu gutxi falta zirela hasi ziren, Plentzian. Herritar batek jakinarazi omen zion Ertzaintzari, bi gazte auto bat manipulatzen ari zirela, eta harrapatu zituenean, Mungia Bidea kaletik ihes egin zutela. Poliziak gertakarien ustezko egileak bilatzen hasi ziren eta, pixka bat geroago, susmagarrien ezaugarri fisikoen deskribapenarekin bat egiten zuten bi gazte aurkitu zituzten: errepidetik zihoazen oinez, Gorlizerako noranzkoan. Patruila autoa ikusterakoan, adingabekoak korrika hasi ei ziren Sagastikoetxe eremurantz, baina ertzainek segituan atzeman eta atxilotu zituzten, ibilgailu bat lapurtzen saiatu izana egotzita.
Ustez, osten saiatu ziren autoak hainbat kalte zituen: atzeko ateetako baten kristala hautsita zegoen, leihatila bateko markoan palankaz zabaldu izanaren zantzuak zeuden eta abio-sistema ere manipulatuta zegoen. Dagozkien polizia-eginbideak amaituta, bi atxilotuak adin txikikoen zentro batera eraman zituzten, eta gaur, Fiskaltzaren esku geratu dira.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun