Getxoko udaltzainek gazte bat atxilotu dute mehatxuz sakeleko tetefonoa lapurtu duelakoan
Getxoko Udaltzaingoak G.M.P. inizialak dituen 20 urteko Erandioko mutila atxilotu du gaur goizean, mehatxuak erabiliz burututako lapurreta baten ustezko egilea delakoan. Tokiko iturriek zabaldutakoaren arabera, udaltzainei deitu die herritar batek, 10:30ak aldera, mehatxuez baliatuz Areetako Amaia kalean lapurtu egin dutela esanez. Dirudienez, beste gazte bat atzetik joan zaio, labana eskuan zuela, sakeleko telefonoa eskatuz. Aparailua kendu ondoren anbulatorioaren aurrean dagoen industri eraikuntzarantz korrika atera omen da gaizkilea. Lapurretaren ustezko egilearen bila hasi da eta biktimak emandako deskripzioarekin bat egiten zuen gazte bat topatu dute udaltzainek, Lamiakoko Vicrila enpresaren sarreran, udal iturriek diotenez. Lehenengo arakatzean, jakaren poltsikoan lapurtutako eskuko telefonoa aurkitu dute poliziek. Atxilotutakoa epailearen esku utzi dute. Argazkian, Getxoko udaltzain bat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun