Zazpi urte dira Euskadiko Orkestra Sinfonikoa (EOS) Getxo udalerrian azken aldiz aritu zenetik. Ostiral honetan, martxoak 12, taldeak berriro eskainiko du kontzertu bat lur getxoztarretan, oraingoan Algortako Erredentoro elizan, "Orkestra herrietan" ekimenaren barruan. Iluntzeko zortzietatik aurrera, musikazaleek Isabel Urrutia musikagile getxoztarraren, Ralph Vaughan Williamsen eta Jean Sibeliusen lanez osatutako programa entzun ahal izango dute, Christian Lindberg zuzendari gonbidatuarekin. Kontzerturako sarrera doakoa izango da. Getxoko Kultur Etxeko iturriek jakinarazi dutenez, saioak "Gerok" pieza izango du abiapuntu. Lan horrekin garaile atera zen Urrutia Espainiako Orkestra Sinfonikoen Elkartearen IV. Konposizio Lehiaketan, 2007an. Pieza Oviedon estreinatu zen, 2008ko azaroaren 28an, Asturiaseko Orkestra Sinfonikoaren eskutik, eta iaz A Coruñan, Bilbon eta Tenerifeko Santa Cruzen entzun ahal izan zen. Argazkia: © Euskadiko Orkestra Sinfonikoa.
Ondoren, EOSek Ralph Vaughan Williamsen "Fa minorreko tuba eta orkestrarako kontzertua" joko du. 1954an sortu zen lana eta egileak Londreseko Orkestra Sinfonikoari dedikatu zion, taldearen 50. urteurrena zela eta. Pieza urte horretan estreinatu zen, ekainaren 13an, Philip Catelinet tuba solista eta John Barbirolli zuzendari aritu zirela. Kontzertu hori zela eta, Vaughan Williamsek zera idatzi zuen eraketari zegokionez, Bachetik gertuago zegoela pieza, Vienako Eskolatik (Mozart eta Beethoven) baino. Algortako saioan, Oscar Abella jardungo da tuba solista. Azkenik, Jean Sibelius konpositore finlandiarraren "5. Sinfonia"-z bukatuko da emanaldia. Lana 1915ean aurkeztu zen lehenengo aldiz Helsinkin, baina horren behin betiko bertsioa ez zen 1919ra arte prestatuta egon, aldaketa handiak egin eta gero.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun