Julian Iantzi telebistako aurkezle ospetsuak hainbat hitzaldi eskainiko ditu martxoaren 16an eta 17an Getxoko hainbat hezkuntza zentrotan, "gazteak euskara erabiltzera motibatzeko helburuarekin", Getxoko Udalaren Euskara Zerbitzuak jakinarazi duenez. Ekimena tokiko erakundeak udalerriko institutuekin eta ikastetxeekin euskararen erabilera sustatzeko indarrean duen Ikas Gehi hitzarmenaren barruan kokatzen da. Besteak beste, “El conquistador del fin del mundo” izeneko telebista saioagatik ezaguna den aurkezleak euskararekin duen esperientzia kontatuko die gazteei: noiz eta nola ikasi zuen, zein garrantzia ematen dion eta abar, udal iturriek azaldu dutenez. Horrela, asteartean, San Nikolas ikastolan, Fadura institutuan eta Azkorri ikastetxean izango da Iantzi; eta asteazkenean, bi hitzaldi eskainiko ditu Aixerrota institutuan. Argazkian, Julian Iantzi martxoaren 6an Eibarko Armeria Eskolan emandako hitzaldian / cc-by-nc-sa Armerixa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun