Moncada 20 Bilboaldeko rock boskoteak Algortan joko du gaur iluntzean. Sarrera doan, emanaldia eskainiko dute 20:30etik aurrera The New tabernan, antzinako Traganarrun, Euskal Herria kaleko 7. zenbakian. Erandion otsailaren 19an emandako kontzertua salbuespena izan dela, azken hileotan Moncada 20 abesti berriak idatzi eta lantzeari eman dio lehentasuna, aurreko gaiak entseatzearekin batera. Borja Aspiunza, Roberto Franco, Oscar Hernandez, Iker Mardones eta Victor Marin-ek osatzen duten taldeak makina bat kanta joko dute, tartean "Ciudad invisible" beraien lehenengo maketarenak. Lan hori iazko urrian aurkeztu zuten deustuarrek, lau lan bilduz: "El mago", "Maquinas fuera de control", "Ciudad invisible" eta "En ocasiones". CDa hiru eurotan eskatu dakioke taldeari. Moncada 20 Uribe Kostan estreinatu zen oholtza baten gainean, Plentzian, iazko apirilaren 3an. Argazkia: © Moncada 20.
Iker Mardones bateria, La niña grunge, Gravity Lock, Los chilis eta S.no taldeetako partaidea izan da aurretik. Azken banda horretan Borja Aspiunza eta Oscar Hernandezekin elkartu zen. Roberto Franco eta Victor Marin, berriz, beste talde batzuekin ibili ziren bere garaian. Bostak bildu eta Bilboko Errekalde auzoko lokal batean hasi ziren entseatzen, Moncada kaleko 20. zenbakian. Hortik dator izena. Gerora, Deustura egin zuten jauzi.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun