Joan den urteko abenduaren 18an, lagun talde bat Urdulizko Uxerre baserrian lapurreta egin zuen. Horretarako, etxe barruan zeuden 83 urteko emakume bat, Felisa Ansoleaga, baserriaren jabea, eta bere neba, 70 urtekoa, lotu eta ahoa estali ostean, kolpatu egin zituzten. Herrizaingo Sailak zabaldutakoaren arabera, lapurreta bukatutzat eman zutenean, lau gizonek ihes egin zuten eta aipatutako egoeran utzi zituzten bi adinduak, laguntza eskatzeko aukerarik gabe. Horrela egon omen ziren bi egun beranduago jabearen semeak aurkitu zituen arte. Bi egun horietan bizi izandako egoera dela eta, emakumea hilik zegoen aurkitu zutenean eta bere neba, aldiz, ospitalera eraman behar izan zuten, hainbat ubelduraz gain, hipotermia eta deshidratazio sintoma larriak zituela eta. Ertzaintzak gertatutakoaren berri izan zuenean, Krimenen ikerketako Unitateko agenteak berehala ekin zioten kasuaren azterketari eta azkenean, ustezko egileak identifikatzea lortu zuten.
Bost susmagarri
Guztira bost susmagarri identifikatu zituzten; dirudienez, baserrietan eta herriguneetatik kanpo dauden etxeetan osten zuen banda bateko kideak dira. Euskal Autonomi Erkidegoan zehar egindako hamar bat lapurreten (5 Bizkaian, 3 Gipuzkoan eta 2 Araban) egikaritzarekin, Urdulizekoa barne, lotu dituzte aipatu susmagarriak. Horrez gain, oraindik ere zabalik dago ikerketa, beste bost lapurretetan parte hartu zutelako susmoa baitaukate.
Joan den asteartean Ertzaintzako Krimenen Ikerketako Unitateko agenteek bost pertsona atxilotu zituzten, bakoitza bere etxean: Otxandion bi atzeman zituzten, bat Gasteizen eta beste biak Barakaldon. Agenteen aurrean deklaratu ostean, susmagarrietako bat aske utzi zuten, beste lau kideen adiskidea bazen ere, ez omen zuelako hauek egindako delituekin inolako zerikusirik izan.
Urdulizko Uxerre baserriko lapurretaren ustezko egileak atxilotu egin dituzte
Ertzaintzak lapur banda bateko ustezko lau kideak atzeman zituen, joan den asteartean, Otxandion, Gasteizen eta Barakaldon. Baserrietan eta herriguneetatik kanpo dauden hamar bat etxetan, EAE osoan zehar banatuak, ostu izana leporatzen diete. Horietako bat 2009ko abenduaren 18an Urdulizko Uxerre baserrian egindakoa litzateke, Eusko Jaurlaritzaren Herrizaingo Sailaren arabera. Lapurreta hartan etxeko jabea, Felisa Ansoleaga, hil egin zen eta bere nebak zauri larriak jasan zituen. 18 eta 45 urte bitarteko ustezko lau lapurrak epailearen esku jarri zituzten atzo, ostirala, goizean; eta horrek, atxilotuetako bat berehala espetxeratzeko agindua eman zuen. Lapurretetan parte hartu izanaz gain, giza hilketa eta lesio delitu bana leporatzen dizkiote. Beste hiru susmagarriak aske utzi zituzten. Beregain hainbat kargu dituzte eta epaiketa noiz ospatuko zain daude eta maiz epailearen aurrean aurkeztu beharko dute. Argazkian, Ertzaintzaren hainbat ikertzaile aurreko batean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun