"Euskomik" gunea EAEko egungo komikiaren arloko erakusleiho bilakatuko da eta bertan sustapen-material anitza eskuratu ahali zango dute bisitariek. Halaber, hainbat jarduera egingo dira eta erakusketa bat kokatuko da bertan, euskal egileen lana sustatzeko asmotan. Guztira, 22 profesionalen lana ikusgai izango da.
Erakustaldia Euskadiko Ilustratzaile Elkarte Profesionalak antolatuta dago eta horretan bildutako lanak katalogo batean argitaratuko dira, "Irudika" izenpean.
Mikel Toral Eusko Jaurlaritzako Kultura Sustatzeko zuzendariaren arabera, “aukera garrantzitsua da euskal marrazkilarientzat, Bartzelonako azoka nazioarteko erreferentea baita mundu osoan”.
Hirurogeita hamarreko hamarkadaren bukaeraz geroztik, komikigintzak garai bizi eta emankorra eduki du Euskadin, eta horren ondorio izan dira han-hemen egindako hainbat erakusketa, jardunaldi eta jaialdi. Gero eta ugariagoak dira alor horretako kultura-azpiegiturek bultzaturiko jarduerak, zeintzuk, argitaletxeen beste zenbait ekimenekin batera, euskal komikigintzaren osasun onaren isla baitira. Faktore horiek guztiek batera egin dute posible egile-multzo bizkor eta sendo bat sortzea –aldez beteranoak eta aldez hasiberriak–, gehienak ezezagunak Euskal Herritik kanpo.
Euskomik standa
EAEk Bartzelonako Komikiaren Nazioarteko Erakusketan izango duen parte hartzea 150 metro karratuko stand batean gauzatuko da. Hiru zatitan banatuko da, gune ezberdinak bereizte aldera:
• Argibide-liburutegiaren gunea: Sustapen-materialak erakutsiko ditu, instituzionalak eta inprimaturiko argitalpen-materialak (esku-orriak, aldizkariak, katalogoak, argitalpenak…).
• Areto nagusiaren gunea: Hemen hainbat jarduera egingo dira, gaur egungo komikigintzarekin estuki loturiko talde eta erakundeen eskutik, hala nola, aurkezpenak, mahai-inguruak, hitzaldiak eta bestelakoak.
• Erakusketaren gunea: oso-osorik EAEko egileen lanak sustatzera dedikatua. Hogeita bi profesionalen lan-bilduma erakutsiko du: nazioartekoenak eta euskal argitalpenetan argitaratuz gorabidean datozen belaunaldi berrikoenak. Hautaketa-irizpideak probintzien arteko oreka ere aintzat hartu du. Egile bakoitzak azken urteotan egindako hiru komiki-plantxa aukeratu ditu, bere lanaren eredu esanguratsu moduan.
Getxoko Komiki eta Manga Azoka Iberiar Penintsulako komiki hiriburuan izango da. Izan ere, maiatzaren 6tik 9ra Bartzelonako Nazioarteko 28. Komiki Azokan parte hartuko du Areeta eta Itzubaltzeta / Romoko ekimenak. Getxoko Udalak bultzatutako azoka beste ekimen eta euskal artistekin batera egongo da Euskomik gunean. Ekimen hori Eusko Jaurlaritzak bultzatua da eta Katalunian azoka euskal komikiaren mundua sustatzea du xede. Getxoko Komiki eta Manga Azokak 9. urteurrena ospatuko du aurtengo azaroaren 26tik 28ra eta komikiaren munduari loturiko ekimen nagusietakoa da Euskal Herrian. Bere ibilbidean, derrigorrezko topagunea bilakatu da komikizaleentzat eta nazioarteko hainbat artista ospetsu bildu ditu. Argazkian, hainbat komikizale 2007ko azokan / © Getxoko Kultur Etxea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun