“Israelgo Estatuaren aurkako boikota. Stop apartheid. Ez Hegoafrikan, ez Palestinan” izenburupean, astearte honetarako, martxoak 16, bi hitzaldi antolatu dituzte Mewando sareak (Bakea eta Duintasuna elkartea, Biladi palestinar kultur zentroa, MunduBat, Bakea eta Elkartasuna eta Euskal Herriko GGKEen Koordinakundeak), Palestinarekin Elkartasunak, Euskadiko Gazteriaren Kontseiluak, EHUko Garapenerako Lankidetzako Bulegoak eta LAB, CC.OO., ELA, EILAS eta ESK sindikatuek. Jardunaldiaren helburua "Boikota, Desinbertsioa eta Zigorrak" kanpaina aurkeztea izango da, "Palestinako lurralde okupatuetan ematen diren giza eskubideen bortxaketak salatzeko erresistentzia zibil baketsu gisa", adierazi dute antolatzaileek. Esparru sindikalean aurrera eraman daitezkeen ekintzak aztertuko dira batik bat. Lehenengo hitzaldia, bihar, eguerdiko 12etan egingo dute, EHUko liburutegi nagusian, Leioa eta Erandioko campusean. Bigarrena, 19:00etan izango da, Bizkaiko Batzar Nagusien aretoan (Hurtado de Amezaga, 6), Bilbon. Argazkian, Gazako lotsaren harresia.
Hitzaldiak Lana Khaskia, Mahmoud Hussien Zawahra eta Sidumo Dlaminiren eskutik izango dira. Khaskia Apna Al Balad elkarteko kidea da, baita Bakerako Emakumeen Koalizioko koordinatzaile orokorra ere. Hussien, berriz, Al Maasara herriko alkatea da eta harresi eta asentamenduen aurkako erresistentzia zibilaren koordinaziorako komitearen ordezkaria. Dlamini, bestetik, Hegoafrikako Sindikatuen Konfederazioko (COSATU) presidentea da eta nazioarteko hainbat hitzalditan parte hartu du Omar Barghoutirekin batera, Israelgo Estatuaren aurkako kanpainaren inguruan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun