Algortan ospatuko diren San Inazio jaien irudia izango dena aukeratzeko, beranduenez, maiatzaren 17an entregatu beharko dira kartelak, Algortako Eztabaida Gunean (Amesti kaleko 3). Data hori igarota, jai batzordeko kideek osatutako epaimahaiak erabakiko du zein den irabazlea eta horrela jakinaraziko dio horri. 300 euro jasoko ditu jaietako kartel gisa aukeratua izango denaren egileak. Saritu gabeko kartelak, berriz, egileei itzuliko zaizkie. Hala ere, guztiak jarriko dituzte ikusgai jai batzordearen bitakoran (algortakosaninazioak.mundua.com).
Kartelen ezaugarriei dagokienez, 70x50 zentimetroko (ez-etzana) neurria eduki beharko dute aurkeztutako lanek, euskarri gogorrean edo paper gainean. Gaia librea bada ere, "Algortako San Inazioak 2010", "Uztailak 29-Abuztuak 1" eta "Jaietan ere euskaraz!" dira jarri beharreko leloak. Kartelaren atzealdean ezizen bat jarriko da, kartelarekin batera emango den gutun-azalaren kanpoaldean ere jarrita egongo dena. Gutun-azalaren barruan egilearen izen-abizenak, helbidea, telefonoa eta helbide elektronikoa, besteak beste. Baliabide informatikoak erabili izatekotan (eta edozein kasutan ere) CD bat aurkeztu beharko da kartelarekin batera, horren irudi digitalizatuarekin.
Uztailaren 29tik abuztuaren 1era bitartean ospatuko dira aurten Algortako San Inazio jaiak. Hain zuzen ere, horien irudia izango dena aukeratzeko, kartel lehiaketa deitu du, beste urte batez, jai batzordeak. Irabazleak 300 euro jasoko ditu. Horrenbestez, maiatzaren 17ra arte izango dute lanak entregatzeko aukera, lehiaketan parte hartu nahi duten guztiek. Horretarako, Algortako Amesti kaleko 3. zenbakian dagoen Eztabaida Gunera jo beharko dute horiek. Bestalde, Algortako San Inazioetako argazki bilduma osatu nahian dabil jai batzordea. Hori dela eta, dauzkaten argazkiak bidaltzeko eskatu die herritarrei. Irudi guztiak jai batzordeko bitakoran (algortakosaninazioak.mundua.com) jarriko dituzte ikusgai. Edozein zalantzatarako aixerrota.jaibatzordea[abildua]gmail.com e-posta helbidea jarri dute algortarren eskura. Azkenik, Facebook sare sozialaren bidez ere egongo da iritziak, eskakizunak, proposamenak… bideratzeko aukera. Jai batzordeak astelehenean, martxoak 22, egingo du hurrengo batzarra, 20:00etan, Algortako Agurra dantza taldearen egoitzan (Illeta, 12 – behea). Argazkian, iazko koadrila jaitsiera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun