Auzitegi Gorenak erabakiko du Falange y Tradicion taldeko kideak Iruñean ala Madrilen epaituko dituzten
Azken egunotan egunkarien orrialdeetara bueltatu da berriro Falange y Tradicion auzia. Horren instrukzioa Espainiako Auzitegi Nazionalak hartzea eskatu zion Gorenari, joan den astean, Maria Paz Benito Oses Iruñeko 3. Instrukzio aretoko epaileak, bere ustez, "nahiko zantzu daudelako" eskuin muturreko bost atxilotuei Zigor Kodean jasota datozen terrorismo delituak egozteko: "Asmo subertsibo argia duten askotariko ekintza bortitzen aurrean gaude. Eskuin muturreko erakunde antolatu, egonkor, armatua da, irauteko bokazioa eta hierarkia bat dituena". Aldiz, Auzitegi Nazionalak dio delitu komunak baino ez direla. Espainiako Auzitegi Gorenak erabaki beharko du zeinek epaituko dituen. Gauzak horrela, atzo bertan, "legearen aplikazioa ez dela guztiontzat berdina argi" geratu dela salatu zuten Falange y Tradicion taldeak egindako indarkeria ekintzen hainbat biktimek, Auzitegi Nazionala "euskal herritarrak jazartzeko epaitegi berezi" bat dela azpimarratuz, "Gara" kazetak gaurko alean (espainolez) luze eta zabal azaldu duenez. Argazkian, sumarioan jasotzen denez, eskuin muturreko taldeak beregain hartu zuen Zigor eta Arkaitz Goikoetxea presoen (orduan Arkaitz baino ez zegoen espetxean) aita-amen Azkorriko (Getxo) baserriak izan zuen erasoa. Argazki gehiago ikusteko sakatu hemen.
"Zigor hiltzaile", "Hilda zaude", "Gora Espainia terrorista" eta "Hil zaitezte" leloak espainolez pintatu eta atariko oin-zatarra eta sasi batzuk gasolinaz erre zituzten, 2009ko uztailaren 17an, arratsaldean, Zigor eta Arkaitz Goikoetxearen aita-amen Azkorriko (Getxo) baserrian. Eraikin osoa egurrezkoa denez, atariari su emateak arrisku larria eragin zitekeela esan zuten hurbilekoek orduan. Mutilen amak UKBERRI.NETi adierazi zionez, 14:00ak aldera atera ziren bera eta senarra kanpoan bazkaltzera, eta bi ordu beranduago, 16:00ak inguruan, hots egin zieten auzokideek, etxea erasotu zutela esanez. Falange y Tradicion taldeko kideek "lehergailu konbentzional motaren bat" bazutela uste du Guardia Zibilak. Ez bakarrik, sumarioak dioenez, Getxoko erasoa beregain hartu zutelako; baizik eta Tuterako Herriko Tabernak eta Arguedasko gaztetxeak antzeko erasoak jasan zituztelako. Besteak beste, Sopelan hainbat urtez bizi eta aurtengo Aste Nagusiko txupinera izandako Sonia Polori egindako heriotza mehatxua ere bere gain hartu zuen Falange y Tradricion taldeak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun