Bizkaiko Foru Aldundiko Ingurumen Sailak eta Euskal Herriko Unibertsitateak lankidetza-hitzarmena dute, Plentziako Itsas Estazioa martxan jartzeko, antzinako itsas sendategian. Itsasoko ekosistemaren osasunarekin, giza osasunean ingurumenaren aldaketak dituzten ondorioekin eta itsasoko baliabide biologikoekin zerikusia duten gaietan ikerketa eta prestakuntza sustatuko ditu zentroak. Bizkaiko Foru Aldundiak, Ingurumen Sailaren bitartez, Plentziako Itsas-Estazioa sustatu eta bultzatzeko konpromisoa hartu zuen, 6.958.894 euroko ekarpena eginez. 2008an milioi bat euro eman zituen, eta 2009an 3.482.851 euro. "Lanak egiteko egutegian aldaketa bat izan denez, 2010ean proiektuari adjudikatutako aurrekontu-partida egokituko da", adierazi dute foru iturriek. Aurten, beste milioi bat euro emango du Aldundiak; eta 2011ko ekitaldian azken ordainketa egingo dute: 1.476.043 euro. Argazkian, orduko EHUko errektore Perez Iglesias hitzarmena sinatzen, Isabel Zarauza alkatearen begiradapean, 2008ko urriaren 3an.
"Hasieran urtekoetan ordaindu beharreko kopuruetan egindako aldaketa da, baina ez dakar inolako aldaketarik konpromisoan hartutako azken zenbatekoan (6.958.894 euro)", zehaztu dute Bizkaiko Foru Aldundiko arduradunek. Proiektuaren helburua da ingurumen zientzien eta hezkuntzaren eremuan irakaskuntza-jarduera zein Itsas Biologia eta Bioteknologiaren arloko ikerketa-jarduera sustatu eta babestea, azaldu dutenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun