Ostiralean lehenengo hiru lagun atxilotu zituen Ertzaintzak Bilboko San Adrian auzoan, sareko arduradunak garraiolari biri 380 haxix kiloengatik 95.000 euro ordaintzen zizkionean. Ordu batzuetara, sareko nagusiaren senide bat atzeman zuten diru kopuru handiz Malagarantz zihoala. Larunbatean, berriz, Leioako pisua arakatu zuten, beste 95.000 euro topatuz.
Portugaleteko lonja batean, ordea, 250 kilo haxix eta droga garraiatzeko moldatutako auto bat topatu zuten. Kotxean bertan beste 50 kilo droga zeuden. Egun berean, erakundeko beste bi partaide atxilotu zituzten. Zazpi gizonezkoak, lau Marokokoak eta beste hiru Espainiako dokumentazioarekin, datozen orduotan igaroko dira guardia epailearen aurretik. Horietaz gain, beste lau pertsonen aurkako salaketa jarri du Ertzaintzak.
Leioan egoitza zuen droga sare baten aurkako operazioan zazpi gizon atxilotu dituzte
Ertzaintzak zazpi gizonezko atxilotu ditu, Leioan egoitza zuen droga sare baten aurkako operatiboan. Operazioan, 700 kilo haxix eta 200.000 euro atzeman dituzte. Herrizaingo Sailaren arabera, Eusko Autonomi Erkidegoko "haxix trafiko banda nagusia" desegin dute, "hilero lau milioi euroko balorea duen droga mugitzen" ei zuena. Operazioa Gernikako 1. Instrukzio Epaitegiak agindu ditu eta sei hilabetez prestatu dute. Sareko arduradunak Leioan luxuko pisua zuen alokatua. Bertan, hileko egun batzuk ematen zituen Maroko, Euskal Herria, Frantzia eta Herbehereen arteko trafikoa koordinatu, salmentak itxi eta taldeko kontuen kontrola eramateko, beti ere bertsio polizialaren arabera. Argazkian, pasa den ekainean Ertzaintzak Araban eta Bizkaian jarduten zuen beste banda bat desegin zuen, 45 kilo haxix atzemanda / © Herrizaingo Saila.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun