Lantzarteko zelaiarekin zer egin "berangoztarrek erabaki dezatela" aurkeztutako herri ekimena atzera bota egin zuen atzo, asteartea, Berangoko Udalbatzak. Gehiengoa duen EAJk, PSE-EEk eta EAk bozkatu zuten 990 herritarrek (biztanleen %15 baino gehiago) babestutako galdeketa egitearen aurka. PPk eta Ezker Batuak, berriz, aldeko botoa eman zuten. Gainera, ez ohiko osoko bilkura izanik, euren iritzia plazaratzeko aukerarik ez zuten izan auzotarrek, galde-eske txandarik egon ez zelako. Anabel Landa alkate jelkideak emandako argudioen artean, "nahita edo nahi gabe, landa osoan eraikiko zela aipatzen" zuen, bere hitzetan, bizilagunek sinatutako idatziak. Horren aurrean, idatziaren "interpretazio okerra" egitea egotzi diote udal agintariari Lantzarteko Auzokide Elkarteko kideek. Bizilagunek diotenez, ondokoa baino ez du aipatzen izkribuak: "Etxebizitzak eraikitzeko, Lantzarteko zelaia saltzeko asmoa dauka Berangoko Udalak". "Osoa" hitza ez da inondik inora agertzen, auzokideen arabera. Argazkian, Lantzarte ingurua Berangon.
Gainera, horrela izango balitz, "herri ekimena izapidetzea zergatik onartu zuten" galdetu diote Udal Gobernuari Lantzarteko Auzokide Elkartekoek. "Esaten duten bezala, herritarren interesen alde egiten ari badira, ze arazo dago galdeketa egin eta irtenbide bat adosteko", gaineratu dute. Ildo horretan, orubearen kalifikazio-aldaketa zelai osorako egin nahi dutela salatu dute berriro. PSE-EEko ordezkariak ere "herritarron onurari" heldu zion: onura ekonomikoari batetik, "dagoeneko martxan dauden hainbat egitasmorekin aurrera jarraitzea ahalbidetuko duelako". Eta bestetik, "ezkerreko erabakia delako herri erdian babestutako etxebizitzak jartzea". Bitartean, EAko eledunak, "ohi bezala, argudiorik ez zuen eman, bere botoa justifikatzeko", Lantzarteko Auzokide Elkarteko kideen arabera. Herrigintza Antolamendurako Plan Orokorrari (HAPO) aurkeztutako alegazioen aurrean, Udalak emango duen erantzunaren zain daude orain auzotarrak. Behin-behinekoz onartu zuten atzo HAPO. Hala ere, "Lantzarte erabilera publikorako izan arte borrokan" jarraituko dutela adierazi dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun