UKTESTeko oharra:
Txalapartari!
Azkenengo asteetan Uribe kostatik irten den ideia baten inguruan bueltaka ibili gara, intentzioa txalapartarien edota gure instrumentua maite dutenen arteko bilkura egitea. Egun honetarako planteamendua nahiko xumea dirudi; Sagardotegi batera joan eta guztion artean parranda polita egitea!
Helburuak: guztion artean elkar ezagutzea, sarea egitea, jende ezberdinarekin joaldi berriak egitea, parranda, euskalkiak nahastea eta sortu daitezkeenak...
Topagunea eta eguna: Txalaparta ardatza izanik pentsatu dugu, onena litzatekeela instrumentuaren hastapenetara bueltatzea (nahiz eta misterioa izan, teoriarik onartuena da), beraz ondo legoke Txotx!-aren inguruan biltzea.
Zumaian, Txindurri Sagardotegia dago eskaintza berezi batekin, bertan lo gelditzeko aukerarekin. Begi onez ikusi dugu lasai ibiltzearena jakinda bertan lo egin dezakegula. Ez dakigu zenbat pertsona gelditzeko kapazitatea daukan baino dana adostea izango zen. Pasadan astean eman ziguten aurrekontua, prezio berezian; 55 euro gehi BEZa pertsona bakoitza, prezio honetan sartzen da gaueko afaria, ohea eta gosaria.
Benetan zaila da guztiontzat posiblea den eguna lotzea, izan ere Txindurri hutsik egon behar da ere. Momentuz libre dagoen eguna apirilaren 10a da. Ontzat ematen dugu printzipioz.
Bertan egin dezakegun plana erabat irekita dago ikusten duzunez, proposamenak, ideiak etab.. behar ditugu ideia honi forma emateko eta guztion artean bada, askoz hobe. Gaur ez dakigu zenbat egon gaitezken prest eta laster konfirmatu beharko dugu, bazatoz?
Gogotsu bazagoz zerrendan apuntatu, e-maila berbidali eta ahal den neurrian deia luzatu egurzale guztiei.
On izan denei eta bitartean egurrei sua!
UKTEST Uribe Kostako Txalaparta Ekimenetarako Sustapen Taldeak txalapartari eta txalaparta zaleen arteko txotx-topaketa antolatzen dihardu. Karlos Galan taldeko kideak zabaldu duenez, bilkura hemendik hilabetera batera, apirilaren 10ean, Gipuzkoako Itziar-Deba herriko Txindurri sagardotegian egiteko asmoa dute. Berez, ez da kasualitatea txalaparta eta sagardotegia bateratzea "txalapartarien edota gure instrumentua maite dutenen arteko bilkuran". Izan ere, ez bada segurutzat jotzen, txalapartaren jatorria sagardoa egiteko zura xafletan, kokatzen dute hainbatek eta hainbatek. Ekimenean parte hartzeko interesa duten txalaparta zaleek Galanekin jar daitezke harremanetan honako posta elektroniko helbidean: galan.karlos[abildua]gmail.com. Argazkian, UKTESTeko kide bat txalaparta astintzen iaz, Algortako Portu Zaharrean, Mintza Egunaren aurkezpenean / cc-by Mikel-Egizu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun