Aberri Eguna sarean antolatzeko asteartean udaletxeetara joatera deitu dute Independentistek
Independentistak sare ekimenak hainbat eskaera egin dizkie independentzia zaleak diren herritarrei. Alde batetik, apirilaren 4an Irun eta Hendaia artean burutuko den Aberri Eguneko ekitaldiei begira, auzolana sustatu eta independentisten sarea handitu nahi dute. Izan ere, pentsaera eta ikusmolde askotako independentisten arteko "besarkadaren Aberri Eguna" gisa definitu du Zelai Nikolas eledun algortarrak. Hori posible egiteko, asteartean "19:30ean herri guztietako udaletxeetan elkartu eta Aberri Eguneko kartelak zabaltzera dei egiten dizuegu. Dagoeneko boluntario mordoa dugu, baina gehiago behar ditugu", Independentistek zabaldu dutenez. Era berean, propaganda.independentistak@gmail.com posta elektronikora idatz dezake asteartean agertzerik ez duenak. Argazkian, Independentistak mugimenduaren aurkezpena / © Independentistak.
Bestalde, independentista internautei laguntza eskatu diete "Ari gara" manifestua inprimatu, Interneta ez dutenen artean atxikimenduak jaso eta independentistak.net webgunera datuak igotzeko. Argibide gehiago independentistok@gamil.com posta elektronikoan eska daiteke. Apirilaren 4ko hitzorduarekin bat egin dute, besteak beste, EA, ezker abertzalea eta GaztEHerria.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun