Txapelketaren aurkezpen ekitaldian, gaur goizean, Alvaro Gonzalez Getxoko Udalaren Kiroletako zinegotziak nabarmendu du txapelketa maila handiko ekitaldia dela eta Estatu espainiarreko emakumezkoen futbolean erreferente bihurtu dela. “Udaletik era honetako kirol ekitaldiak bereziki babestu nahi ditugu, Getxon urteko kirol egutegi barruko garrantzitsuenetakoa baita, TKE Ligako estropada eta Nazioarteko Txirrindulari Zirkuituarekin batera”. Horregatik guztiagatik, Alvaro Gonzalezek herritar guztiak animatu ditu Emakumezkoen Futbol Txapelketa ikustera joan daitezen, "erakargarriak diren gauza asko" baititu.
Marcosek, bere aldetik, txapelketaren helburu bikoitza azpimarratu du: emakumezkoen futbola suspertzea eta gure herria bertotik kanpo ezagutzera ematea. “Horrez gainera, bere arrakasta bermatu nahi dugu, kirol, antolakuntza eta ikusleen aldetik, Superligan punta puntakoak diren taldeak gonbidatuz”, gehitu du Bizkerrekeko kideak.
Lehiaketari berari dagokionez, Txapelketaren aurreneko fasean, bi multzo ezarri dira. A multzoan F.C. Barcelona, Prainsa Zaragoza eta Rayo Vallecano izango dira, eta B multzoan, Athletic Club, U.D. Levante eta Bizkerre F.T.. Bi multzoetan ostirala 2an jokatuko dira kanporaketak, 10:15etik aurrera, goizean, eta 16:30etik aurrera, arratsaldean, Bolueko zelaian. 25 minutuko bi zati izango dituzte partiduek, ohi bezala.
Hurrengo egunean, larunbata 3an, finalerdiak eta finala jokatuko dira. Finalerdiak Boluen jokatuko dituzte 9:30etik aurrera, 25 minutuko bi zati dituzten partiduetan ere.
Finala Fadurako udal zelaian jokatuko da 12:10etik aurrera, 40 minutuko bi zatiko norgehiagokan.
Antolatzaileek aurreratu dute finalean zehar 6 kamiseta –kamiseta bana taldeko– zozketatuko dituztela sarrera erosi duten ikusleen artean. Talde batzuek gizonezkoen lehen taldeko jokalariek sinatutako elastikoa bidaliko dute eta beste batzuek nesken lehen taldeko jokalariek sinatutakoa emango dute.
Aurreko faseko partiduak zein finalerdiak eta finala ikusteko sarrera 3 eurokoa da, baina Getxo markako kide diren klubetako kirolariak doan sartuko dira.
Datozen apirilaren 2an eta 3an Algortako Bolue eta Fadurako zelaietan jokatuko den Emakumezkoen Getxoko Futbol Txapelketaren IV edizioa aurkeztu dute gaur. Jaime Marcos antolatzailea den Bizkerre Futbol Taldearen presidenteordeak azaldu duenez, "beste urte batez, maila handiko taldeak bilduko ditu" txapelketak. Dena den, aurten ez baina datozen urteetako ekitaldietan "nazioarteko talderen bat" gonbidatzeko asmoa dute. Nahiz eta hori esan, Bizkerreko emakumeek Athleticekoekin lehiatzeaz gain, Gaztela eta Aragoiko talde banari eta Herrialde Katalanetako beste biri egin beharko diete aurre. Izan ere, Rayo Vallecano egungo txapelduna, Zaragozako Prainsa, Bartzelona eta UD Levante taldea izango dira Algortan. Bestalde, tokiko emakume futbolaren erakustokia den txapelketarako 19.000 euroko dirulaguntza eman duela iragarri du Getxoko Udalak. Argazkian, Joseba Marcos, ezkerrean, Alvaro Gonzalez Kirol zinegotziarekin batera / © Getxo.net.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun