Arte Ederretako ikasleen asanbladak zabaldutako oharra:
Arte Ederretako ikasleok Bolognak dakarren plan berriaren inposaketaren aurrean, ezezko bortitza adierazi nahi dugu. Inposaketa bat den momentutik, badakigu zer dakarren horrek: gure iritzia eta beharrizanak alde batera utzi eta soilik beraien interesetara bideratzea plan hau. Horretaz gain, hezkuntza globalizatu bat ezartzeko helburua duen plan berri honek, hezkuntzaren pribatizazioa du ondorio nagusi, honetarako eredu yankia eredutzat harturik.
Etorkizunean honen ondorio nagusi besteak beste, kredituen garestitzea, hautazkoen murrizketa eta gure ikasketak ordu ez presentzialetara bideratzea izango dira, horrek dakarren guztiarekin. Saldu nahi diguten plan berri honek, gure ikasketen merkantilizazioa besterik ez dakar. Hori izanik helburu bakarra guk ikasi nahi dugunari garrantzia eman beharrean,gure ikasketak lan munduari begira baino ez dizkigute bideratzen.
Beraiek eskaintzen diguten desinformazioak gure mesfidantza elikatzen du. honengatik guztiagatik eta jakinda gauza batzuk bidean uzten ditugula, egungo eta etorkizuneko ikasketa ereduaren aurka agertzen gara.
Bologna planaren aurkako itxialdia egiten ari dira Arte Ederretako fakultatean
Atzo, astelehena, Bologna planaren kontra lau egunez luzatuko den itxialdiari hasiera eman zion Arte Ederretako ikasleen asanbladak, EHUko Leioa eta Erandioko campusean. Fakultateko hallean 70 pertsona inguru bildu ziren egun osoan zehar, Topatu.info gazte atariak zabaldu duenez. Ate irekien garaia denez, ikasleek hainbat ekimen egingo dituzte: hala nola, hitzaldiak, performance-ak, eta abar. Fakultatearen sarreran informazio gune bat jarri dute bertara sartzen den edonor protestaren beri izan dezan eta Bolognaren aurkako sinadura bilketari ekin diote. Hurrengo egunetan bertan lo egingo dutela jakinarazi du asanbladak eta, bide batez, gonbidapena luzatu die gainontzeko ikasleei ekimenean parte hartzeko. Argazkian, itxialdia Arte Ederretan / cc-by-sa Topatu.info.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun