Lan istripu hori "ekidin zitekeela" salatu zuten atzo sindikatuek. CCOOren ustez, segurtasun neurriak "zorrotz" jarraitzen zirela ez zen zaintzen eta "balekoa" zen haien betekizuna. ELAk "Bizkaian errepide mozketetarako jardun protokoloa ez da zehaztu ezta txertatu ere" gogoratu zuen.
Euzko Gaztediren dolumina
Leioako gazteria jeltzaleak honako testua kaleratu du bi auzokideen heriotzaren aurrean: "Leioako EGIk bi heriotzen mina oso hurbiletik sentitu izan du, Pedro María Parola Ducar eta José Alberto Ayo Artecheren familiari zein lagunei doluminik zintzoenak adierazi nahi dizkiegu. Leioako bi herritar joan zaizkigu lan istripuan. Gaur, haien irudia eta ibilbidea gogoratzeko astirik baino ez daukagu. Goian beude".
Jose Alberto Ayo eta Pedro María Parola leioaztarrak zirenak hil ziren atzo Zaldibarren beharrean ari zirela. 13:15ak aldera, A-8 autobiako seinalizazio lanetan zeudela, Volkswagen markako furgoneta batek harrapatu eta errailak banatzen dituen hormigoi murruaren aurka zapaldu zituen, berehalako heriotza eraginez. Osasun zerbitzuetako langileek ezin izan zuten ezer egin. Furgonetako bidaiariak larri zauritu ziren eta Mendaro eta Donostiako ospitaletara eraman zituzten. Atzo gauean Leioako hainbat biztanlek UKBERRI.NETi adierazi ziotenez, Ayo eta Parola, 49 eta 50 urtekoa, hurrenez hurren, "oso ezagunak" ziren herrian, "bizitza osoa" eman zutela bertan. Biak Ceprenor Zornotzako enpresarentzat egiten zuten lan. Elizkizunak gaur 19:00etan egingo dituzte Leioako San Juan Bataialaria elizan. Argazkian, iaz beste langile leioaztarren heriotza salatzeko LABek egindako elkarretaratze bat / cc-by Koska irratia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun