Urte bete bada euskal gehiengo sindikalak, guztiak batean, gizarte politikak eskatzen dabiltzala. "Ekonomia krisia langileok ordainduko genuela jakinarazi genuen, eta horixe da gobernuek egin dutena, banketxe eta aberatsen mesedetan. Maiatzaren 21eko greban ozen esan genuen, gizarte politiken noranzkoa aldatu ezean, gehiengoaren, langileon, eskubide murrizketa etorriko zela. Eta '10 urrats gizarte eredu baterako' dekalogoaren bidez, alternatiba aurkeztu genuen", azaldu du LABeko Iratxe Azkuek. Sindikatuen proposamenek 131.894 lagunen babesa jaso zuten.
Entzun gor eta murrizketekin
Bada, sindikatuek salatu dutenez, euren eskaerei "entzun gor" egin eta "orain murrizketekin" datoz. Pentsioen sistema publikoari dagokionez, "erretiro adina atzeratu, erretiroa kobratzeko baldintzak zorroztu eta Aldi Baterako Ezintasuna murriztu" nahi dutela diote ELA, LAB, ESK, EILAS, EHNE eta Hiruk. Bestalde, "lan malgutasuna areagotuz, langileak errazago eta merkeago kaleratuko dira, kontratazio agentzia pribatuak sustatuko dira, lan hitzarmenak Madrilen negoziatuko dira, lan kontratu prekarioak babestu...", ohartarazi du Azkuek. Azkenik, elkarrizketa sozialerako mahaietan, "enpresariak garaile" direla kritikatu dute lan erakundeek, euren ustez, "xantaiak planteatzen dituztelako". Ildo betean, "gobernuek eskubide murrizketak areagotzen dituzte" salatu dutenez.
Uribe Kosta eta Erandioko langileak ere deitu dituzte larunbateko mobilizazioetara
Uribe Kosta eta Erandio mailan ere langileen eskubideen "inolako murrizketarik" onartuko ez dutela adierazi dute gaur ELA, LAB, ESK, EILAS, EHNE eta Hiru sindikatuek. LABeko Iratxe Azkueren ahotik salatu dutenez (mp3), gobernuek "pentsioen sistema publikoa arriskuan jartzen ari dira; lan erreformaren bidez, langileen kaleratzea merkatu nahi dute; eta 'elkarrizketa sozialaren' bidez, langileok mututu nahi gaituzte". Guzti hori, "banketxe eta aberatsen mesedetan", zehaztu duenez. Horren aurrean, urteetako lorpenen ·defentsa sutsua" egiteko gertu agertu dira sindikatuak. "Euskal Herrian erabakitzen jarraitu nahi dugulako, lan harreman eta babes sozialeko eremua defendatzen dugu. Besteak beste, pentsio eta lan eremuko erabakiak har ditzagun", zehaztu du Azkuek. Hartara, gehiengo sindikalaren aldarrikapenen alde eta gobernuek proposatutako neurrien aurka, larunbat honetan, martxoak 27, Hego Euskal Herriko hiriburuak hartzera deitu dituzte langileak. 17:30ean, Bilboko Jesusen Bihotzetik abiatuko dira manifestazioan, euskal langileen eskubideen alde. Argazkian, ELAren Areetako egoitzan eman dute prentsaurrekoa, goizean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun